قازاقستاندا «اقتوبە – ورال – رەسەي فەدەراسياسى شەكاراسى» حالىقارالىق تراسساسىندا جايىق وزەنى ارقىلى جاڭا كوپىر سالۋ جوسپارلانۋدا، دەپ حابارلايدى infohub.kz سايتى.
ق ر كولىك مينيسترلىگىنىڭ باسشىلىعى باتىس قازاقستان وبلىسىنا جۇمىس ساپارى بارىسىندا جايىق وزەنى ارقىلى جاڭا اۆتوموبيل كوپىرىن سالۋ جوباسىنىڭ ازىرلەمەسىمەن تانىستى. جوبا مەملەكەت باسشىسىنىڭ تاپسىرماسى بويىنشا جۇزەگە اسىرىلۋدا جانە حالىقارالىق ماڭىزى بار اۆتوموبيل جولىندا ءقاۋىپسىز ءارى ۇزدىكسىز قوزعالىستى قامتاماسىز ەتۋگە باعىتتالعان.
جاڭا كوپىر تەحنيكالىق تەكسەرۋ قورىتىندىسى بويىنشا اۆاريالىق دەپ تانىلعان قولدانىستاعى كوپىر قۇرىلىستارىنىڭ قاسىندا سالىناتىن بولادى. جوبانى ىسكە اسىرۋ جول قوزعالىسى قاۋىپسىزدىگىن ارتتىرۋعا جانە ايماقتىڭ جول جەلىسىندەگى ەڭ جۇكتەلگەن ۋچاسكەلەردىڭ بىرىندە سەنىمدى كولىك بايلانىسىن قامتاماسىز ەتۋگە مۇمكىندىك بەرەدى.
جوبا بويىنشا 8 شاقىرىم اۆتوموبيل جولىن، سونداي-اق ەكى زاماناۋي ءمونوليتتى كوپىر سالۋ كوزدەلگەن: ارنالىق بولىگىنىڭ ۇزىندىعى 513 مەتر جانە جايىلمالىق بولىگىنىڭ ۇزىندىعى 1710 مەتر.
قازىرگى ۋاقىتتا تەحنيكالىق-ەكونوميكالىق نەگىزدەمە ازىرلەنىپ، ۋاكىلەتتى مەملەكەتتىك ورگاندارمەن كەلىسىلدى.
زاماناۋي ينجەنەرلىك شەشىمدەر مەن تەحنولوگيالاردى قولدانۋ كولىك ينفراقۇرىلىمىنىڭ سەنىمدىلىگىن ايتارلىقتاي ارتتىرۋعا، ۋچاسكەنىڭ وتكىزۋ قابىلەتىن ۇلعايتۋعا جانە نىساننىڭ ۇزاق مەرزىمدى ءقاۋىپسىز پايدالانىلۋىن قامتاماسىز ەتۋگە مۇمكىندىك بەرەدى.
جوبامەن تانىسۋ قورىتىندىسى بويىنشا كولىك مينيسترلىگىنىڭ باسشىلىعى مەملەكەتتىك ساراپتامادان ءوتۋدى جەدەلدەتۋدى، جاقىن ارادا قۇرىلىستى قارجىلاندىرۋ كوزىن انىقتاۋدى، سونداي-اق جوبانى ىسكە اسىرۋدىڭ بارلىق كەزەڭدەرىندە ساپانى قاتاڭ باقىلاۋدى قامتاماسىز ەتۋدى تاپسىردى.