يادرولىق فيزيكا ينستيتۋتىنىڭ (يافي) قىزمەتكەرلەرى جالاقى مەن دەمالىس اقىسىنىڭ كەشىكتىرىلگەنىن حابارلادى. مەكەمە باسشىلىعى بەرەشەكتىڭ بارىن راستاپ، جاقىن ارادا قاراجات تۇسەتىنىنە سەندىردى. بۇل تۋرالى Orda.kz حابارلايدى.
بۇعان دەيىن الەۋمەتتىك جەلىلەردە ينستيتۋت قىزمەتكەرلەرىنىڭ جالاقى الماعانى، ال كوپشىلىگىنىڭ دەمالىس اقىسىنسىز دەمالىسقا كەتكەنى تۋرالى جازبا جاريالاندى. اۆتورلار شىلدە ايىنىڭ سوڭىنا دەيىن ەسەپتەسىپ بەرۋ تۋرالى ۋادەلەردىڭ سەنىم تۋدىرمايتىنىن ايتىپ، جاعدايدى قازاقستاندىق عىلىمعا سوققى دەپ اتادى.
ينستيتۋتتاعىلار جاعدايعا تۇسىنىك بەرىپ، قارجىلاندىرۋدىڭ ءتۇسۋى كۇتىلەتىنىن ايتتى. وكىلدەردىڭ ايتۋىنشا، مامىر ايىنداعى جالاقىنىڭ 40 پايىزى مەن ماۋسىم ايىنداعى 85 پايىزى كولەمىندەگى بەرەشەكتى 20-24 شىلدە ارالىعىندا تولەۋ جوسپارلانعان. ال شىلدە ايىنىڭ جالاقىسىن قىزمەتكەرلەر ادەتتەگى مەرزىمدە – قازاقستان زاڭناماسىنا سايكەس 10 تامىزدان كەشىكتىرمەي الادى.
بۇعان دەيىن يادرولىق فيزيكا ينستيتۋتى ەلدەگى نەگىزگى عىلىمي ورتالىقتاردىڭ ءبىرى ەكەنى حابارلانعان بولاتىن. مۇندا الماتىداعى جالعىز زەرتتەۋ يادرولىق رەاكتورى جۇمىس ىستەيدى، ونىڭ بازاسىندا ونكولوگيالىق اۋرۋلاردى دياگنوستيكالاۋ جانە ەمدەۋگە ارنالعان راديويزوتوپتار وندىرىلەدى، عىلىمي زەرتتەۋلەر جۇرگىزىلىپ، قازاقستاننىڭ بولاشاق اتوم سالاسى ءۇشىن ماماندار دايىندالادى.