جامبىل وبلىسىندا اكە كامەلەتكە تولماعان ۇلىنىڭ كوزىنشە اراق ىشكەنى ءۇشىن جاۋاپكەرشىلىككە تارتىلدى، دەپ حابارلايدى infohub.kz.
جامبىل وبلىسى سوتتارىنىڭ رەسمي Telegram-ارناسىندا جاريالانعان اقپاراتقا سايكەس، كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوت بالا تاربيەسى جونىندەگى مىندەتتەردى ورىنداماعان (اقبتك-نىڭ 127-بابىنىڭ 1-بولىگى) ەر ادامعا قاتىستى اكىمشىلىك ءىستى قارادى.
مەركى اۋدانىنىڭ تۇرعىنى ۇيىندە كامەلەتكە تولماعان ۇلىنىڭ كوزىنشە الكوگولدىك ىشىمدىكتەر ءىشىپ، وعان تەرىس ىقپال ەتكەنى انىقتالدى. وسىعان بايلانىستى اكەگە قاتىستى حاتتاما تولتىرىلىپ، اكىمشىلىك ءىس قوزعالدى.
ەر ادامنىڭ كىناسى حاتتامامەن، تاراپتاردىڭ ايعاقتارىمەن جانە ءىستىڭ وزگە دە ماتەريالدارىمەن راستالادى. ول كىناسىن تولىق مويىندادى.
اقبتك-نىڭ 127-بابىنىڭ 1-بولىگىنىڭ سانكسياسى 10 اەك مولشەرىندە ايىپپۇل كوزدەيدى. الايدا، كىناسىن مويىنداعانىن، قۇقىق بۇزۋشىلىقتى العاش رەت جاساعانىن، وڭ مىنەزدەمەسىن جانە اۋىرلاتاتىن ءمان-جايلاردىڭ بولماۋىن ەسكەرە وتىرىپ، سوت ايىپپۇل مولشەرىن 30%-عا تومەندەتتى.
سوت قاۋلىسىمەن ەر ادام اقبتك-نىڭ 127-بابىنىڭ 1-بولىگى بويىنشا كىنالى دەپ تانىلىپ، وعان 7 اەك مولشەرىندە، ياعني 30 275 تەڭگە ايىپپۇل سالىندى.
قاۋلى ازىرگە زاڭدى كۇشىنە ەنگەن جوق.