جامبىل وبلىسىندا ماس كۇيىندە كولىككە وتىرعان ەر ادام BMW-مەن اعاشقا سوعىلىپ، 20 تاۋلىككە قامالدى، دەپ حابارلايدى infohub.kz سايتى.
سارىسۋ اۋداندىق سوتى ازامات ف.-عا قاتىستى اكىمشىلىك قۇقىقبۇزۋشىلىق ءىسىن قارادى. ول ماس كۇيىندە كولىك جۇرگىزىپ، اۆتوكولىكتىڭ زاقىمدالۋىنا سەبەپ بولعان (اقبتك-نىڭ 608-بابىنىڭ 3-بولىگى).
2026 جىلدىڭ شىلدەسىندە سارىسۋ اۋدانىنىڭ 29 جاستاعى تۇرعىنى ماس كۇيىندە BMW كولىگىنە وتىرعان. جاڭاتاس قالاسىندا كەلە جاتىپ، جۇرگىزۋشى رۋلگە يە بولا الماي، كولىك اعاشقا سوعىلعان. جول-كولىك وقيعاسىندا ادامدار زارداپ شەككەن جوق، الايدا كولىككە مەحانيكالىق زاقىم كەلگەن.
كىناسى تاراپتاردىڭ ايعاقتارىمەن، حاتتامامەن جانە مەديسينالىق كۋالاندىرۋ قورىتىندىسىمەن دالەلدەنگەن. سوتتا قۇقىقبۇزۋشى كىناسىن تولىق مويىنداپ، وكىنگەن.
اقبتك-نىڭ 608-بابىنىڭ 3-بولىگىنىڭ سانكسياسى 20 تاۋلىككە اكىمشىلىك قاماققا الۋدى جانە 7 جىلعا كولىك جۇرگىزۋ قۇقىعىنان ايىرۋدى كوزدەيدى. سوت كىنانى مويىنداۋدى جەڭىلدەتەتىن ءمان-جاي دەپ تانىدى. اۋىرلاتاتىن ءمان-جايلار انىقتالعان جوق.
سوت قاۋلىسىمەن ف. اقبتك-نىڭ 608-بابىنىڭ 3-بولىگى بويىنشا كىنالى دەپ تانىلىپ، وعان 20 تاۋلىككە قاماق جازاسى جانە 7 جىلعا كولىك جۇرگىزۋ قۇقىعىنان ايىرۋ تاعايىندالدى. قاۋلى زاڭدى كۇشىنە ەندى.