قازاقستان رەسپۋبليكاسى سىرتقى ىستەر مينيسترلىگىنىڭ جاڭا رەسمي وكىلى — جانبولات وسەنوۆ. ديپلوماتتىڭ ەلدىڭ شەتەلدىك مەكەمەلەرىندە، ونىڭ ىشىندە اقش پەن ۇلىبريتانياداعى ەلشىلىكتەردە، سونداي-اق بيزنەس قۇرىلىمداردا باي تاجىريبەسى بار، دەپ حابارلايدى infohub.kz.
جانبولات قالدىباي ۇلى وسەنوۆ 1983 جىلى تۇركىستان وبلىسىندا دۇنيەگە كەلگەن. 2004 جىلى ماسكەۋ مەملەكەتتىك حالىقارالىق قاتىناستار ينستيتۋتىنىڭ (مگيمو) ساياساتتانۋ فاكۋلتەتىن بىتىرگەن.
ديپلوماتيالىق مانسابىن وسەنوۆ 2006 جىلى قازاقستان سىرتقى ىستەر مينيسترلىگىندە باستادى. العاشىندا ەۋروپا جانە امەريكا دەپارتامەنتىندە اتتاشە قىزمەتىن اتقاردى، ءبىر جىلدان كەيىن قازاقستاننىڭ ۇلىبريتانياداعى ەلشىلىگىنە جىبەرىلدى.
2007-2011 جىلدار ارالىعىندا وسەنوۆ قازاقستاننىڭ اقش-تاعى ەلشىلىگىندە ءۇشىنشى، ەكىنشى جانە ءبىرىنشى حاتشى قىزمەتتەرىن ساتىلاپ اتقاردى.
ديپلوماتيالىق جۇمىستان كەيىن ول بيزنەس سالاسىنا اۋىستى. 2011-2012 جىلدارى وسەنوۆ «شەۆرون مۋنايگاز ينك.» كومپانياسىنىڭ ينۆەستيسيالىق جوبالار ۇيلەستىرۋشىسى بولدى.
كەيىن ول سىم-گە قايتا ورالدى. 2012-2014 جىلدارى وسەنوۆ ۆەدومستۆونىڭ رەسمي وكىلى جانە قازاقستان سىرتقى ىستەر مينيسترلىگى حالىقارالىق اقپارات كوميتەتى ءتوراعاسىنىڭ ورىنباسارى قىزمەتتەرىن اتقاردى.
مانسابىنىڭ كەلەسى كەزەڭى قايتادان «شەۆرون مۋنايگاز ينك.»-پەن بايلانىستى بولدى. 2014-2017 جىلدارى ول كومپانيانىڭ ۇكىمەتپەن جانە قوعاممەن بايلانىس جونىندەگى ديرەكتورىنىڭ ورىنباسارى بولىپ جۇمىس ىستەدى.
سونىمەن قاتار، 2015-2017 جىلدارى وسەنوۆ ەۋرازيالىق حالىقارالىق قاتىناستار كەڭەسىن ديرەكتور رەتىندە باسقاردى.
2017-2022 جىلدارى ول قازاقستاننىڭ ۇلىبريتانياداعى ەلشىلىگىندە كەڭەسشى-ەلشى قىزمەتىن اتقاردى. ودان كەيىن، 2022-2023 جىلدارى 24 KZ تەلەارناسىندا «مير» باعدارلاماسىنىڭ جۇرگىزۋشىسى بولدى.
جاڭا تاعايىنداۋعا دەيىن وسەنوۆ «ۆەرنىي كاپيتال» كومپانياسىنىڭ كورپوراتيۆتىك كوممۋنيكاسيالار جونىندەگى باسقارۋشى ديرەكتورى بولىپ جۇمىس ىستەدى.
ايتا كەتەيىك، وسەنوۆ اعىلشىن جانە فرانسۋز تىلدەرىن مەڭگەرگەن.