جامبىل وبلىسىندا ءىرى مال ۇرلىعى اشكەرەلەندى: شارۋا قوجالىعىنىڭ يەسى 30 ملن تەڭگە تۇراتىن 250 باس ۇساق مالدان ايىرىلدى، ال ءۇش كۇدىكتى ارنايى جاساقتىڭ كۇش قولداۋىمەن ۇستالدى، دەپ حابارلايدى infohub.kz سايتى.
NUR.KZ اگەنتتىگىنىڭ وبلىستىق پوليسيا دەپارتامەنتىنە سىلتەمە جاساپ حابارلاۋىنشا، مەركى اۋدانىندا شارۋا قوجالىعىنىڭ يەسى مالدى ساناۋ كەزىندە 250 باس ۇساق مالدىڭ جوعالعانىن بايقاپ، پوليسياعا جۇگىنگەن.
وسى فاكتى بويىنشا قازاقستان رەسپۋبليكاسى قىلمىستىق كودەكسىنىڭ «الدىن الا ءسوز بايلاسۋ ارقىلى ادامدار توبى جاساعان، اسا ءىرى مولشەردەگى مال ۇرلىعى» بابى بويىنشا سوتقا دەيىنگى تەرگەۋ باستالدى.
جەدەل-ىزدەستىرۋ ءىس-شارالارى بارىسىندا پوليسيا قىزمەتكەرلەرى ۇرلانعان مالدىڭ ءبىر بولىگىن تۇرار رىسقۇلوۆ اۋدانىنىڭ اۋماعىنان تاپتى. مالدى تانىستىرۋ راسىمىنەن كەيىن ول زاڭدى يەسىنە قايتارىلدى.
تەرگەۋ بارىسىندا ۇرلىققا شارۋا قوجالىعىندا جۇمىس ىستەگەن مالشىنىڭ قاتىسى بولۋى مۇمكىن ەكەنى انىقتالدى. «پوليسيا دەرەگىنشە، ول باسقا ادامدارمەن الدىن الا ءسوز بايلاسىپ، مال ۇرلاۋعا قاتىسقان. سونداي-اق ۇرلانعان مالدىڭ ءبىر بولىگى كەيىن باسقا ادامدارعا 800 مىڭ تەڭگەگە ساتىلعانى بەلگىلى بولدى»، — دەدى جامبىل وبلىسى پوليسيا دەپارتامەنتىندە.
قىلمىستىق ءىس بويىنشا ءۇش كۇدىكتى ۇستالدى. سوتتىڭ سانكسياسىمەن ولار ەكى ايعا قاماۋعا الىندى.
قازىرگى تاڭدا قىلمىستىق ءىستىڭ بارلىق ءمان-جايىن جان-جاقتى، تولىق جانە وبەكتيۆتى انىقتاۋعا باعىتتالعان تەرگەۋ ارەكەتتەرى جالعاسۋدا.