جامبىل وبلىسىندا تۇرعىن ۇي-كوممۋنالدىق شارۋاشىلىق مەكەمەسىندە ەكولوگ بولىپ جۇمىس ىستەگەن ايەل قار تازالاۋ كەزىندە اۋىر وندىرىستىك جاراقات الدى. وقيعا 2023 جىلدىڭ جەلتوقسانىندا بولعان: ايەل كوشە سىپىرىپ ءجۇرىپ تايىپ كەتىپ، قۇلاپ قالعان. قورداي اۋداندىق سوتى جۇمىس بەرۋشى مەن جۇمىسكەر اراسىنداعى بىتىمگەرشىلىك كەلىسىمىن بەكىتىپ، وعان 1،6 ملن تەڭگە تولەنەتىن بولدى، دەپ حابارلايدى infohub.kz سايتى.
جامبىل وبلىسى سوتتارىنىڭ رەسمي Telegram-ارناسىندا حابارلانعانداي، قورداي اۋداندىق سوتى دەنساۋلىققا كەلتىرىلگەن زياندى وتەۋ تۋرالى ازاماتتىق ءىستى قارادى. جازاتايىم وقيعادا جۇمىس بەرۋشىنىڭ كىناسى 100% دەپ تانىلدى.
مەديسينالىق قورىتىندىعا سايكەس، ايەلدىڭ ەڭبەككە قابىلەتتىلىگى 50% جوعالعان. وعان قوسىمشا مەديسينالىق كومەك جانە الەۋمەتتىك وڭالتۋ، ونىڭ ىشىندە ساناتوري-كۋرورتتىق ەمدەۋ ۇسىنىلعان.
تالاپ قويۋشى سوتقا دەنساۋلىققا كەلتىرىلگەن زياندى وتەۋدى جانە مەديسينالىق ۇسىنىستاردا كوزدەلگەن ەمدەلۋدى قامتاماسىز ەتۋدى سۇراپ جۇگىنگەن. سوت تالقىلاۋى بارىسىندا تاراپتار كەلىسىمگە كەلىپ، ءوزارا ءتيىمدى شارت جاساستى.
كەلىسىم شارتى بويىنشا جۇمىس بەرۋشى سوت ۇيعارىمى زاڭدى كۇشىنە ەنگەننەن كەيىن ءۇش جۇمىس كۇنى ىشىندە ايەلگە 1،6 ملن تەڭگە تولەۋگە مىندەتتەندى. كەلىسىم بەكىتىلىپ، ءىس بويىنشا ءىس جۇرگىزۋ توقتاتىلدى. ۇيعارىم زاڭدى كۇشىنە ەندى.