جامبىل وبلىسىندا سوت ءتورت جاۋاپكەردى ينتەرنەت-الاياقتاردىڭ قۇربانى بولعان ايەلگە ەكى ميلليون تەڭگەدەن استام اقشا قايتارۋعا مىندەتتەدى. شەشىم ازىرگە زاڭدى كۇشىنە ەنگەن جوق، دەپ حابارلايدى infohub.kz.
جامبىل وبلىسى سوتتارىنىڭ رەسمي Telegram-ارناسىندا حابارلانعانداي، مويىنقۇم اۋداندىق سوتى ايەلدىڭ ءتورت جاۋاپكەرگە قاتىستى نەگىزسىز بايىتۋ سوماسىن ءوندىرىپ الۋ تۋرالى تالاپ ارىزى بويىنشا ازاماتتىق ءىستى قارادى.
2025 جىلدىڭ جەلتوقسانىندا تالاپكەر ينتەرنەت-الاياقتىقتىڭ كەڭ تارالعان سحەماسىنىڭ قۇربانى بولدى. جۇمىستا ءجۇرىپ، وعان بەلگىسىز بىرەۋ قوڭىراۋ شالىپ، ءوزىن كوممۋنالدىق قىزمەت قىزمەتكەرى رەتىندە تانىستىردى. دوموفوندى اۋىستىرۋ سىلتاۋىمەن ودان SMS-حابارلاماداعى كودتى سۇرادى. كەيىن ونىمەن حقكو جانە بانك قاۋىپسىزدىك قىزمەتىنىڭ قىزمەتكەرلەرى دەپ تانىستىرعان باسقا ادامدار بايلانىسقا شىقتى.
ونىڭ اتىنا نەسيە راسىمدەلۋىنىڭ الدىن الۋ سىلتاۋىمەن الاياقتار ايەلدى ءوز نۇسقاۋلارىن ورىنداۋعا كوندىردى. ناتيجەسىندە ول بانكتەردەن نەسيە راسىمدەپ، التىن بۇيىمدارىن لومباردتارعا ساتتى.
ونىڭ الداۋ اسەرىنەن جۇمساعان جالپى سوماسى 2،3 ميلليون تەڭگەگە جۋىق بولدى. بۇل قاراجات ءتورت جاۋاپكەردىڭ بانكتىك شوتتارىنا اۋدارىلدى: تيىسىنشە 500، 400، 365 جانە 981 مىڭ تەڭگە.
استانا قالالىق پوليسيا دەپارتامەنتى قىلمىستىق ءىس قوزعادى، تالاپكەر جابىرلەنۋشى دەپ تانىلدى.
سوت بانكتىك چەكتەر مەن ۇزىندىلەردى قوسا العاندا، دالەلدەمەلەردى زەرتتەپ، تالاپتى تولىق قاناعاتتاندىردى. ءتورت جاۋاپكەردەن تالاپكەردىڭ پايداسىنا اقشا قاراجاتى، مەملەكەتتىك باج شىعىندارى جانە وكىلدىك شىعىندار جالپى سوماسى 2،3 ميلليون تەڭگەدەن استام ءوندىرىلدى.
شەشىم زاڭدى كۇشىنە ەنگەن جوق.