جامبىل وبلىسىندا جول-كولىك وقيعاسىنان كەيىن ماتەريالدىق زالالدى ءوندىرىپ الۋ تۋرالى داۋ تاراپتاردىڭ تاتۋلاسۋىمەن اياقتالدى، دەپ حابارلايدى infohub.kz.
جامبىل وبلىسى سوتتارىنىڭ رەسمي Telegram-ارناسىندا حابارلانعانداي، تالاس اۋداندىق سوتى جول-كولىك وقيعاسىندا زاقىمدانعان ءاۆتوموبيلدىڭ ماتەريالدىق زالالىن جانە تاۋارلىق قۇنىنىڭ جوعالۋىن ءوندىرىپ الۋ تۋرالى ازاماتتىق ءىس بويىنشا تاراپتاردى تاتۋلاستىردى.
باستاپقىدا تالاپكەر استانا قالاسىنىڭ ازاماتتىق ىستەر جونىندەگى اۋدانارالىق سوتىنا جۇگىنگەن، الايدا كەيىن تاراپتار ەكستەرريتوريالدى سوتتىلىقتى قولدانۋ تۋرالى ءوتىنىش بىلدىرگەن. سوت ۇيعارىمىمەن ءىس جامبىل وبلىسىنىڭ تالاس اۋداندىق سوتىنا قاراۋعا جىبەرىلدى.
2026 جىلعى اقپاندا استانادا Toyota Yaris جانە Volkswagen Tiguan كولىكتەرىنىڭ قاتىسۋىمەن جول-كولىك وقيعاسى بولعان. جاۋاپكەر اكىمشىلىك جاۋاپكەرشىلىككە تارتىلعان. ساقتاندىرۋ كومپانياسى تالاپكەرگە 2،6 ملن تەڭگە تولەگەن. الايدا، ەسەپ بويىنشا، ءاۆتوموبيلدى جوندەۋ قۇنى 3،2 ملن تەڭگەدەن اسقان. سونىمەن قاتار، اۆتوموبيل تاۋارلىق قۇنىن جوعالتقان. تالاپكەر جاۋاپكەردەن ساقتاندىرۋ تولەمى مەن ناقتى زالال اراسىنداعى ايىرماشىلىقتى 1،6 ملن تەڭگە كولەمىندە ءوندىرىپ الۋدى سۇراعان.
سوت تالقىلاۋى بارىسىندا تاراپتار مەدياسيا تارتىبىمەن ءوزارا كەلىسىمگە كەلگەن. كەلىسىم شارتتارى بويىنشا جاۋاپكەر سوت ۇيعارىمى زاڭدى كۇشىنە ەنگەنگە دەيىن تالاپكەرگە 1،3 ملن تەڭگە تولەۋگە مىندەتتەنگەن. تالاپكەر تالاپ قويۋدان باس تارتقان. اتالعان سوما تولەنبەگەن جاعدايدا تالاپكەر 1،6 ملن تەڭگەنى ءوندىرىپ الۋعا اتقارۋ پاراعىن الۋعا قۇقىلى.
سوت كەلىسىمدى بەكىتىپ، ءىس بويىنشا ءىس جۇرگىزۋدى توقتاتقان. تالاپكەرگە مەملەكەتتىك باج قايتارىلعان. ۇيعارىم زاڭدى كۇشىنە ەنگەن.