جامبىل وبلىسىندا بولعان جول-كولىك وقيعاسىندا ءتورت ادام قازا تاپتى. الەۋمەتتىك جەلىلەردە كولىكتىڭ ءبىرىن بەلگىلى سپورتشى، بۇرىنعى پوليسيا قىزمەتكەرى سايا اۋەلبەكوۆا باسقارعان بولۋى مۇمكىن دەگەن اقپارات تارادى، دەپ حابارلايدى infohub.kz سايتى.
Halyqstan Telegram-ارناسىنىڭ مالىمەتىنشە، مەركى اۋدانىنداعى قوستوگەن اۋىلىنا كىرەبەرىستە ۆنەدوروجنيك «جيگۋلي» كولىگىنە سوعىلعان، ونىڭ جۇرگىزۋشىسى وقيعا ورنىندا قازا تاپقان. كۋاگەرلەردىڭ ايتۋىنشا، 27 جاستاعى جىگىت اناسىن الىپ قايتۋعا شىققان، ءبىراق ول ۇلىن كۇتىپ الا الماعان. جاس جىگىت ونىڭ جالعىز ۇلى بولعان.
«ءبىرىنشى كولىكتىڭ رولىندە سپورتشى، كوپبالالى انا، قوستاناي وبلىسى پوليسيا دەپارتامەنتىنىڭ بۇرىنعى قىزمەتكەرى سايا اۋەلبەكوۆا بولدى. اپاتتا ۆنەدوروجنيكتىڭ ءۇش جولاۋشىسى دا قازا تاپتى. اۋىل تۇرعىندارىنىڭ جازۋىنشا، ولاردىڭ بىرەۋى اۋەلبەكوۆانىڭ تۋىسى. قازا تاپقان جىگىتتىڭ تۋىستارى ايەلدىڭ جازادان قۇتىلىپ كەتۋىنەن قورقادى، سەبەبى ول بۇرىنعى بولسا دا پوليسيا قىزمەتكەرى، سوندىقتان ءادىل تەرگەۋ تالاپ ەتەدى»، — دەلىنگەن جازبادا.
Threads جەلىسىندە دە جكو تۋرالى حابارلاما پايدا بولدى. «مەركى اۋدانىندا قازا تاپقاندار بار جكو بولدى، شامامەن كولىكتىڭ ءبىرىن سايا اۋەلبەكوۆا باسقارعان — ول قازاقستاندىق پوليسيا قىزمەتكەرى (سوبر ينسپەكتورى)، بەس بالانىڭ اناسى جانە قازنەتتە «باتىر انا» دەپ اتالاتىن بەلگىلى جەكپە-جەك سپورتشىسى»، — دەپ جازىلعان جازبادا.
جامبىل وبلىسى پوليسيا دەپارتامەنتىنىڭ NUR.KZ تىلشىسىنە حابارلاۋىنشا، 20 قىركۇيەكتە مەركى اۋدانىنىڭ قوستوگەن اۋىلىندا جكو بولىپ، سالدارىنان 4 ادام قازا تاپقان. جول-كولىك وقيعاسى فاكتىسى بويىنشا قىلمىستىق ءىس قوزعالدى.
«الدىن الا دەرەكتەرگە سايكەس، Tank 500 كولىگىنىڭ جۇرگىزۋشىسى قارسى جولاققا شىعىپ، «ۆاز-2107» كولىگىمەن سوقتىعىسقان. جول-كولىك وقيعاسىنىڭ سالدارىنان «ۆاز» جۇرگىزۋشىسى مەن ۆنەدوروجنيكتىڭ 3 جولاۋشىسى قازا تاپتى»، — دەدى ۆەدومستۆونىڭ ءباسپاسوز قىزمەتى.
Tank كولىگىنىڭ جۇرگىزۋشىسى اۋداندىق اۋرۋحاناعا جات قىزىلدى. «ول ىشكى ىستەر ورگاندارىنىڭ قىزمەتكەرى ەمەس»، — دەپ مالىمدەدى پوليسيادا. ءىس جامبىل وبلىسى پد وندىرىسىنە بەرىلدى. قازىرگى تاڭدا بولعان وقيعانىڭ بارلىق ءمان-جايىن وبەكتيۆتى انىقتاۋعا باعىتتالعان تەرگەۋ ارەكەتتەرى جالعاسۋدا.
«تەرگەۋ بارىسى پد باسشىلىعىنىڭ باقىلاۋىندا. تەرگەۋ ناتيجەلەرى بويىنشا قولدانىستاعى زاڭناماعا سايكەس ءتيىستى پروسەستىك شەشىم قابىلدانادى»، — دەپ قورىتىندىلادى ۆەدومستۆودا.
سونىمەن قاتار سايا اۋەلبەكوۆانىڭ Instagram پاراقشاسىندا ونىڭ قارىنداسىنىڭ اتىنان جازبا پايدا بولدى، وندا سپورتشىنىڭ جكو-عا تاپ بولعانى حابارلاندى. «قارىنداسىم اۋىر اپاتقا تاپ بولدى. ءقازىر اۋىر جاعدايدا جاتىر. ول قارسى شىققان كولىكتەن قۇتىلۋعا تىرىسىپ، سونىڭ سالدارىنان اپاتقا ۇشىرادى. بەس كىشكەنتاي بالاسى جەتىم قالماۋى ءۇشىن ونى قولداۋلارىڭىزدى سۇرايمىن»، — دەلىنگەن جاريالانىمدا.