جامبىل وبلىسىندا قۇقىق قورعاۋ ورگاندارى زاڭسىز كوشى-قون ارناسىن ۇيىمداستىردى دەگەن كۇدىكتى ءتورت ادامدى انىقتاپ، ۇستادى، دەپ حابارلايدى infohub.kz سايتى.
NUR.KZ اگەنتتىگىنىڭ وبلىستىق پروكۋراتۋراعا سىلتەمە جاساپ حابارلاۋىنشا، زاڭسىز كوشى-قون فاكتىلەرىنىڭ جولىن كەسۋ ءۇشىن قورداي اۋدانىنىڭ پروكۋراتۋراسى ۇلتتىق قاۋىپسىزدىك جانە ىشكى ىستەر ورگاندارىنىڭ قىزمەتكەرلەرىن تارتىپ، ۆەدومستۆوارالىق تەرگەۋ-جەدەل توبىن قۇردى.
كەلىسىلگەن تەرگەۋ-جەدەل شارالارىنىڭ ناتيجەسىندە الماتى اۋماعىندا اعىمداعى جىلدىڭ مامىر–شىلدە ايلارىندا قازاقستان رەسپۋبليكاسىنىڭ مەملەكەتتىك شەكاراسىن بەلگىلەنگەن وتكىزۋ پۋنكتتەرىنەن تىس جەردەن زاڭسىز كەسىپ وتكەن قىرعىزستان مەن وزبەكستاننىڭ 10 ازاماتى انىقتالدى.
زاڭسىز كوشى-قون ارناسىن ۇيىمداستىردى دەگەن كۇدىكپەن 4 ادام اشكەرەلەنىپ، ۇستالدى. ولاردىڭ 3-ەۋى — قازاقستان، 1-ەۋى — قىرعىزستان ازاماتى.
«سوتقا دەيىنگى تەرگەۋ ماتەريالدارى بويىنشا، قىرعىز رەسپۋبليكاسىنىڭ ازاماتى شەتەلدىكتەردى مەملەكەتتىك شەكاراعا دەيىن الىپ بارعان، ودان كەيىن قازاقستان اۋماعىندا ولاردى الماتىعا دەيىن تاسىمالداۋدى قامتاماسىز ەتكەن سىبايلاستارى قارسى العان»، — دەدى جامبىل وبلىسىنىڭ پروكۋراتۋراسىندا.
بارلىق كۇدىكتىگە قاماۋعا الۋ تۇرىندەگى بۇلتارتپاۋ شاراسى قولدانىلدى. وسى فاكتى بويىنشا ق ر قىلمىستىق كودەكسىنىڭ 394-بابىنىڭ 2-بولىگىمەن سوتقا دەيىنگى تەرگەۋ جۇرگىزىلۋدە.