قازاقستان پرەزيدەنتى قاسىم-جومارت توقايەۆ «قازاقستان — جۇڭگو» ينۆەستيسيالىق فورۋمى اياسىندا بەينەبايلانىس ارقىلى جۇگەرىنى تەرەڭ وڭدەيتىن زاۋىتتىڭ اشىلۋ راسىمىنە قاتىسىپ، جامبىل وبلىسىندا ونەركاسىپتىك پارك قۇرىلىسىنىڭ باستاۋىن بەردى. ءىس-شاراعا جامبىل وبلىسىنىڭ اكىمى ەربول قاراشۇكەيەۆ تە قاتىستى، دەپ حابارلايدى infohub.kz سايتى.
«بۇگىن ءبىز ايماق ەكونوميكاسى ءۇشىن ماڭىزدى وقيعاعا كۋا بولىپ وتىرمىز. قىسقا مەرزىمدە مۇندا زاماناۋي ءوندىرىس قۇرىلىپ، ول اگروونەركاسىپ كەشەنىنە، قايتا وڭدەۋ سالاسىنا جانە ءبىزدىڭ اۋىل شارۋاشىلىعى تاۋارىن وندىرۋشىلەرگە جاڭا مۇمكىندىكتەر اشىپ وتىر. بۇل جوبا ءىرى ينۆەستيسيالاردىڭ ايماققا كەلىپ جاتقانىن، جاڭا وندىرىستەر، جۇمىس ورىندارى مەن ەكونوميكالىق ءوسۋ نۇكتەلەرى قۇرىلىپ جاتقانىن ايقىن كورسەتەدى»، — دەدى ەربول قاراشۇكەيەۆ.
ىسكە قوسىلعان كاسىپورىن ورتالىق ازياداعى امينقىشقىلدارىن شىعاراتىن العاشقى زاۋىت بولدى. جوبانىڭ ءۇش كەزەڭىنىڭ بارلىعىن جۇزەگە اسىرۋعا شامامەن 1،5 ملرد دوللار ينۆەستيسيا تارتۋ جوسپارلانۋدا. 1 500-گە جۋىق جۇمىس ورنىن اشۋ كوزدەلگەن. ءبىرىنشى كەزەڭدە كاسىپورىن جىلىنا 500 مىڭ توننا جۇگەرى وڭدەيدى. تولىق جوبالىق قۋاتقا شىققان سوڭ وڭدەۋ كولەمىن جىل سايىن 3 ملن تونناعا جەتكىزۋ جوسپارلانۋدا.
زاۋىت امينقىشقىلدارىن شىعارۋعا ماماندانعان. نەگىزگى ونىمدەردىڭ قاتارىندا — يزولەيسين، لەيسين، ۆالين، ترەونين جانە گلۋتامين. ولاردىڭ كەيبىرەۋى ادام اعزاسى ءۇشىن اسا ماڭىزدى. كاسىپورىن ءونىمى تاعام جانە فارماسەۆتيكا ونەركاسىبىندە، بيوتەحنولوگيا سالاسىندا، سونداي-اق ارنايى تاعام مەن جەم قوسپالارىن وندىرۋدە سۇرانىسقا يە. دايىن ءونىمنىڭ 80%-ى ەكسپورتقا جىبەرىلىپ، 20%-ى ىشكى نارىقتا ساتىلادى دەپ كۇتىلۋدە.
«Shengtai Biotech — Fufeng كومپانياسىنىڭ قىتايدان تىس جەردە سالعان العاشقى وندىرىستىك كەشەنى. كاسىپورىن جۇمىسى ءۇشىن شيكىزاتتىڭ ايتارلىقتاي كولەمى قاجەت. ءبىرىنشى كەزەڭدە شامامەن 500 مىڭ توننا جۇگەرى ساتىپ الۋدى جوسپارلاپ وتىرمىز. بۇل جەرگىلىكتى اۋىل شارۋاشىلىعى تاۋارىن وندىرۋشىلەر ءۇشىن جاڭا ءارى تۇراقتى وتكىزۋ نارىعىن قۇرادى. سوندىقتان ءبىز ايماق اگراريلەرىمەن ىنتىماقتاستىققا مۇددەلىمىز جانە ولاردى جۇگەرى ەگىس القاپتارىن ۇلعايتىپ، ءونىمدى زاۋىتقا وتكىزۋگە شاقىرامىز»، — دەدى «SHENGTAI BIOTECH CO.، LTD» ج ش س باسشىسى ۆان ياندۋن.
ايماق باسشىسىنىڭ ايتۋىنشا، كاسىپورىننىڭ ىسكە قوسىلۋى وبلىس اگراريلەرى ءۇشىن دە ەرەكشە ماڭىزعا يە. «ءبىز ءۇشىن ءوندىرىس كولەمىن ۇلعايتۋ عانا ەمەس، ايماق ىشىندە تولىققاندى وڭدەۋ تىزبەگىن قالىپتاستىرۋ دا ماڭىزدى. زاۋىت جۇگەرىگە تۇراقتى سۇرانىس قۇرىپ، اۋىل شارۋاشىلىعى تاۋارىن وندىرۋشىلەردى تۇراقتى وتكىزۋ نارىعىمەن قامتاماسىز ەتەدى جانە قوسىلعان قۇنى جوعارى باسەكەگە قابىلەتتى ءونىم شىعارۋعا مۇمكىندىك بەرەدى. تۇپتەپ كەلگەندە، مۇنىڭ ءبارى ەكونوميكانى دامىتۋعا جانە وبلىس تۇرعىندارىنىڭ ءال-اۋقاتىن ارتتىرۋعا قىزمەت ەتۋى ءتيىس»، — دەپ اتاپ ءوتتى ەربول قاراشۇكەيەۆ.
جامبىل وبلىسى ينۆەستيسيا تارتۋ جانە جاڭا وندىرىستەر قۇرۋ باعىتىنداعى جۇيەلى جۇمىسىن جالعاستىرىپ كەلەدى. بۇگىندە ايماقتىڭ ينۆەستيسيالىق پورتفەلى جالپى قۇنى 5،6 ترلن تەڭگە بولاتىن 116 جوبانى قامتيدى. ولاردى جۇزەگە اسىرۋ 20 مىڭنان استام جاڭا جۇمىس ورنىن اشۋدى كوزدەيدى. 2026 جىلدىڭ سەگىز ايىندا وبلىس ەكونوميكاسىنا 621،4 ملرد تەڭگە ينۆەستيسيا تارتىلىپ، وتكەن جىلدىڭ سايكەس كەزەڭىمەن سالىستىرعاندا 48،7%-عا ارتقان. بيىل جالپى قۇنى 471 ملرد تەڭگە بولاتىن 47 ينۆەستيسيالىق جوبانى جۇزەگە اسىرۋ جوسپارلانۋدا.