جۇمىس بەرۋشىنىڭ جاڭا مىندەتتى زەينەتاقى جارناسى ەسەبىنەن قالىپتاسقان زەينەتاقى جيناقتارىنىڭ ءبىر بولىگى سوڭعى ءبىر جىلدا ينفلياسيا 10،2% بولعان كەزدە 19،12% ينۆەستيسيالىق كىرىس اكەلدى، دەپ حابارلايدى infohub.kz سايتى.
ءبىرىڭعاي جيناقتاۋشى زەينەتاقى قورىندا (بجزق) ساقتالاتىن قازاقستاندىقتاردىڭ زەينەتاقى جيناقتارى ينۆەستيسيالىق كىرىس الۋ ءۇشىن باسقارۋشى كومپانيالار تاراپىنان ۇنەمى ينۆەستيسيالانىپ وتىرادى. بجزق دەرەكتەرىنە سايكەس، 2026 جىلعى 1 تامىزداعى جاعداي بويىنشا مىندەتتى، مىندەتتى كاسىپتىك جانە ەرىكتى زەينەتاقى جارنالارى (مزج، مكزج جانە ەزج) ەسەبىنەن قالىپتاسقان قاراجاتتىڭ باسىم بولىگىن قازاقستان ۇلتتىق بانكى باسقارادى – 26،933 ترلن تەڭگە. جىل باسىنان بەرى ونىڭ ينۆەستيسيالىق قىزمەتى ناتيجەسىندە زەينەتاقى اكتيۆتەرىنىڭ كىرىستىلىگى 4،39%-دى، ال ءبىر جىلدا 7،13%-دى قۇرادى. ال وسى كەزەڭدەگى ينفلياسيا جىل باسىنان بەرى 5،7%، ال ءبىر جىلدا 10،2% بولدى.
جۇمىس بەرۋشىنىڭ مىندەتتى زەينەتاقى جارناسىنىڭ (جمزج) ينۆەستيسيالاۋ ناتيجەلەرى ەرەكشە كوزگە ءتۇستى. بۇل قاراجات قازاقستاندىقتاردىڭ شارتتى شوتتارىندا ساقتالادى جانە بولاشاقتا جاڭا تولەمدەردى قالىپتاستىراتىن بولادى. جمزج-نى دا ۇلتتىق بانك ينۆەستيسيالايدى – ءقازىر ونىڭ باسقارۋىندا 1،273 ترلن تەڭگە بار. جىل باسىنان بەرى كىرىستىلىك 10،84%-دى، ال ءبىر جىلدا 19،12%-دى قۇرادى، بۇل سول كەزەڭدەگى باعا وسىمىنەن ەكى ەسە دەرلىك كوپ.
ايتا كەتۋ كەرەك، جمزج تەك تەڭگەمەن سالىنادى، ال تەڭگە سوڭعى ءبىر جىلدا ايتارلىقتاي نىعايدى.
سونداي-اق قازاقستاندىقتار زەينەتاقى جيناقتارىنىڭ ءبىر بولىگىن ينۆەستيسيالىق پورتفەلدى باسقارۋشىلارعا (يپب) سەنىپ تاپسىرا الادى. ەسكە سالايىق، 7 قىركۇيەكتەن باستاپ ولارعا بجزق-داعى بارلىق اكتيۆتەرىن سەنىپ تاپسىرۋعا بولادى. ولاردىڭ 2026 جىلعى 1 تامىزداعى قىزمەت ناتيجەلەرى تومەندەگىدەي:
«حالىق بانكىنىڭ ەنشىلەس ۇيىمى» اق «Halyk Finance» (باسقارۋىندا – 71،88 ملرد تەڭگە) جىل باسىنان بەرى 6،34%، ال ءبىر جىلدا 9،34% كىرىس اكەلدى؛ «Alatau City Invest» اق (باسقارۋىندا – 21،67 ملرد تەڭگە) جىل باسىنان بەرى 5،55%، ال ءبىر جىلدا 10،99% كىرىس اكەلدى؛ «سەنتراس سەكيۋريتيز» اق (باسقارۋىندا – 18،92 ملرد تەڭگە) جىل باسىنان بەرى 9،72%، ال ءبىر جىلدا 15،63% كىرىس اكەلدى – بۇل يپب-لار اراسىنداعى ەڭ جوعارى ناتيجە؛ «BCC Invest» اق (باسقارۋىندا – 17،74 ملرد تەڭگە) جىل باسىنان بەرى 6،24%، ال ءبىر جىلدا 9،35% كىرىس اكەلدى؛ «Halyk Global Markets» اق (باسقارۋىندا – 6،72 ملرد تەڭگە) جىل باسىنان بەرى 6،11%، ال ءبىر جىلدا 10،56% كىرىس اكەلدى؛ «Tansar Capital» اق (باسقارۋىندا – 568،2 ملن تەڭگە) 2026 جىلعى 8 ساۋىردەن باستاپ 1،13% كىرىس اكەلدى.
ەسكە سالايىق، Tansar Capital – جاڭا باسقارۋشى، ال Halyk Global Markets، كەرىسىنشە، ەندى جاڭا زەينەتاقى جيناقتارىن قابىلدامايدى جانە 2027 جىلدان باستاپ ەسكىلەرىن باسقارۋدى توقتاتادى – ولار ۇلتتىق بانككە بەرىلەدى.
وسىلايشا، ۇلتتىق بانك مزج، مكزج جانە ەزج باسقارۋدان ەڭ تومەن كىرىستىلىكتى، ال جاڭا مىندەتتى زەينەتاقى جارناسىنان ەڭ جوعارى كىرىستىلىكتى كورسەتتى. ينفلياسيانى يپب-لاردىڭ جارتىسى عانا باسىپ وزدى.