ماڭعىستاۋ وبلىسىنىڭ تۇرعىنى التى جىلدان كەيىن ادىلەتتىلىككە قول جەتكىزدى: سوت ونىڭ جەتىم رەتىندە باسپانا كەزەگىنەن زاڭسىز شىعارىلعانىن تانىدى. بۇل تۋرالى infohub.kz سايتى حابارلايدى.
ول ەرتە جاستان اتا-اناسىنان ايىرىلىپ، 2002–2013 جىلدارى وبلىستىق بالالار ۇيىندە تاربيەلەنگەن. 2009 جىلى 7 جەلتوقساندا ول «جەتىم بالالار» ساناتى بويىنشا باسپاناعا مۇقتاجدار ەسەبىنە رەسمي تۇردە قويىلعان.
2018 جىلدىڭ باسىندا ول كەزەكتە 21-ورىندا تۇرعان. الايدا 2020 جىلى جاڭاوزەن تۇرعىن ۇي-كوممۋنالدىق شارۋاشىلىق ءبولىمىنىڭ شەنەۋنىكتەرى ونى تۇراقتى تىركەۋ مەكەنجايىنىڭ وزگەرۋىن سىلتاۋراتىپ، تىزىمنەن شىعارىپ تاستادى.
جەتىم ازامات بۇرىنعى كەزەك ورنىن قايتارۋدى تالاپ ەتىپ سوتقا جۇگىندى. تەرگەۋ بارىسىندا زاڭنامانىڭ وسىنداي ازاماتتاردى باسپانا بەرىلگەنگە دەيىن ەسەپتەن شىعارۋعا تىيىم سالاتىنى انىقتالدى.
«2020 جىلى تالاپكەر باسپاناعا مۇقتاجدار ەسەبىنەن شىعارىلعان كەزدە ول زاڭ تالاپتارىنا سايكەس ەسەپتەن شىعارىلۋعا جاتپايتىن ازاماتتار ساناتىنا جاتاتىن»، — دەپ ءتۇسىندىردى سوتتا.
سوت تالاپتى قاناعاتتاندىرىپ، جاڭاوزەن تۇرعىن ۇي-كوممۋنالدىق شارۋاشىلىق ءبولىمىن ەر ادامدى العاشقى ەسەپكە قويۋ كۇنى — 2009 جىلعى 7 جەلتوقساننان باستاپ كەزەككە قالپىنا كەلتىرۋگە مىندەتتەدى. شەشىم زاڭدى كۇشىنە ەندى.