قازاقستان مەن وزبەكستان شەكاراسىنداعى جاڭارتىلعان «جىبەك جولى» كەدەن بەكەتى تامىزدا اشىلادى، دەپ حابارلايدى infohub.kz.
نىساندى رەكونسترۋكسيالاۋ بىلتىرعى مامىردا باستالدى. قازىرگى ۋاقىتتا ينجەنەرلىك جەلىلەردىڭ قۇرىلىسى تولىق اياقتالىپ، سىرتقى ارلەۋ جۇمىستارى ءجۇرىپ جاتىر. جاڭعىرتۋدان كەيىن كەشەننىڭ اۋدانى ەكى ەسەگە ۇلعايدى. بۇرىن وتكىزۋ پۋنكتى تاۋلىگىنە 30 مىڭ جولاۋشىعا قىزمەت كورسەتە السا، ەندى بۇل كورسەتكىش 70 مىڭعا دەيىن جەتەدى.
رەكونسترۋكسيا قۇنى 11 ميلليارد تەڭگەدەن استى.
جاڭارتىلعان كەشەن ىسكە قوسىلعاننان كەيىن قازاقستان-وزبەكستان شەكاراسىن كەسىپ ءوتۋ ۋاقىتى قىسقارادى دەپ كۇتىلۋدە. سونىمەن بىرگە، بۇل وتكىزۋ پۋنكتى تەك جولاۋشىلار باعىتىندا عانا جۇمىس ىستەيدى.
«جىبەك جولى» كەدەن بەكەتىنىڭ باسشىسى اسقار اينامقۇلوۆتىڭ ايتۋىنشا، «ەكى بولەك عيمارات سالىندى، سونىڭ ارقاسىندا كولىك اعىندارى توعىسپايدى. بارلىق پروسەستەر بارىنشا وڭتايلاندىرىلادى، ال نىساننىڭ ءوزى زاماناۋي تالاپتار مەن حالىقارالىق ستاندارتتارعا ساي بولادى. ىسكە قوسىلعاننان كەيىن وتكىزۋ پۋنكتى كۇنىنە 2 مىڭ جەڭىل اۆتوموبيل مەن 200 اۆتوبۋسقا قىزمەت كورسەتە الادى».