قىرعىزستان پرەزيدەنتى سادىر جاپاروۆ 2027 جىلعى 27 قاڭتارعا بەلگىلەنگەن مەملەكەت باسشىسىن سايلاۋ تۋرالى جارلىققا قول قويدى. قۇجات بيۋدجەت سالاسى قىزمەتكەرلەرىن سايلاۋالدى ۇگىتكە تارتۋعا تىكەلەي تىيىم سالادى، دەپ حابارلايدى infohub.kz سايتى.
پرەزيدەنتتى ەركىن جانە اشىق سايلاۋدى قامتاماسىز ەتۋ جونىندەگى شارالار تۋرالى جارلىققا سايكەس، كانديداتتاردىڭ پايداسىنا ۇگىت جۇرگىزۋگە مۇعالىمدەردى، وقۋشىلاردى، وقىتۋشىلاردى، ستۋدەنتتەردى، مەديسينا قىزمەتكەرلەرىن، الەۋمەتتىك قىزمەت قىزمەتكەرلەرىن، سونداي-اق وزگە دە مەملەكەتتىك جانە مۋنيسيپالدىق ۇيىمداردىڭ قىزمەتكەرلەرىن تارتۋعا تىيىم سالىنادى.
مينيسترلەر كابينەتىنە ۇگىتكە زاڭسىز قاتىساتىن نە قىزمەت بابىن كانديداتتاردىڭ مۇددەسىنە پايدالاناتىن لاۋازىمدى تۇلعالاردى تارتىپتىك جاۋاپكەرشىلىككە تارتۋ تاپسىرىلدى. قاجەت بولعان جاعدايدا مۇنداي باسشىلار مەن قىزمەتكەرلەر اتقاراتىن لاۋازىمدارىنان بوساتىلادى.
«جارلىق سونداي-اق مەملەكەتتىك جانە مۋنيسيپالدىق ورگانداردىڭ سايلاۋ پروسەسىنە ارالاسۋىنىڭ جانە اكىمشىلىك رەسۋرستى پايدالانۋىنىڭ الدىن الۋعا باعىتتالعان. ورتالىق سايلاۋ كوميسسياسىنا زاڭنامانى بىركەلكى قولدانۋ جانە ازاماتتاردى حاباردار ەتۋ ءۇشىن قوسىمشا شارالار قابىلداۋ ۇسىنىلدى. قۇجات قىرعىزستان زاڭناماسىنا سايكەس حالىقارالىق بايقاۋشىلاردىڭ قاتىسۋىن كوزدەيدى»، — دەلىنگەن حابارلامادا.
ەسكە سالايىق، شامامەن ءبىر اي بۇرىن سادىر جاپاروۆ 2027 جىلدىڭ قاڭتارىندا وتەتىن ەل پرەزيدەنتىن سايلاۋعا قاتىساتىنىن رەسمي تۇردە راستاعان بولاتىن.