قىرعىزستان پرەزيدەنتى سادىر جاپاروۆ جاقىندا بەرگەن سۇحباتىندا ۇقك بۇرىنعى باسشىسى كامچىبەك تاشيەۆتى مەملەكەت باسشىسى لاۋازىمىنا ءوزىنىڭ ءىزباسارى رەتىندە قولداۋ مۇمكىندىگىن قاراستىرعانىن مويىندادى، دەپ حابارلايدى infohub.kz.
جۋرناليست الي توكتاكۋنوۆپەن اڭگىمەسىندە جاپاروۆ 2027 جىلعى پرەزيدەنتتىك سايلاۋعا قاتىسپاي، دەمالىسقا شىعىپ، جولدى تاشيەۆكە بوساتۋدى جوسپارلاعانىن ايتتى. الايدا كەيىن ول ىقتيمال ءىزباسارىنىڭ دايىندىعىنا كوڭىلى تولماي، شەشىمىن وزگەرتكەن.
«مەن 2027 جىلى التى جىلدىق پرەزيدەنتتىك مەرزىمىم اياقتالعاننان كەيىن، ەگەر كامچى دايىن بولسا، 2027 جىلعى قايتا سايلاۋعا تۇسپەيمىن دەپ ويلادىم. كامچى پرەزيدەنت بولار ەدى، ال مەن دەمالىسقا كەتەر ەدىم. مەندە وسىنداي جوسپار بولدى. وسىدان ءبىر جىل بۇرىن وعان ءوزىم ايتقانمىن»، — دەدى جاپاروۆ.
ول سونداي-اق كەتۋ نيەتىنىڭ سەبەبىن ءتۇسىندىردى: «مەن ءتورت جىل شەتەلدە ءومىر ءسۇردىم، ءتورت جىل تۇرمەدە وتىردىم، ال سوڭعى التى جىلدى كونۆوي استىندا وتكىزگەندەي بولدىم. شاشىم اعاردى، نەمەرەلەرىم پايدا بولدى، وتباسىممەن بولعىم كەلدى. وعان: "سەن دايىن بول، اينالاڭدى تازالا، ءوز ادامدارىڭدى تاربيەلە" دەپ ايتتىم».
الايدا، پرەزيدەنتتىڭ ايتۋىنشا، تاشييەۆ ءۇمىتتى اقتاماعان. «كەيىن قاراسام — ول دايىن ەمەس. ونىڭ قىزمەتكەرلەرى تيىستىدەي ارەكەت ەتپەيدى، ونىڭ اينالاسىنداعىلار كوككە ۇشتى. 75 اقساقالدىڭ حاتى پايدا بولعاندا، پارلامەنتتى گەنەرالدىڭ جاقتاستارى مەن قارسىلاستارىنا بولە باستاعاندا، مەن ونى شاقىرىپ: "بۇلاي بولمايدى. ادامداردى بولۋگە بولمايدى. حالىقتى سولتۇستىك پەن وڭتۇستىككە بولەتىندەردى قاتاڭ جازالايمىن، ويتكەنى حالىق ەندى عانا بىرىگە باستادى. سوندىقتان رەنجىمە، مەن سەنى قىزمەتتەن بوساتامىن. ەگەر سايلاۋعا تۇسسەڭ، مەن ساعان بارلىق جاعدايدى جاسايمىن" دەدىم»، — دەپ تۇيىندەدى جاپاروۆ.