جاپونيانىڭ وڭتۇستىگىندەگى كيۋسيۋ ارالىندا 7،1 بالدىق جەر سىلكىنىسى تىركەلىپ، سۋنامي تۋرالى ەسكەرتۋ جاريالاندى، دەپ حابارلايدى infohub.kz سايتى.
جاپونيا مەتەورولوگيالىق اگەنتتىگىنىڭ مالىمەتىنشە، جەر سىلكىنىسىنىڭ وشاعى تايىز بولعان. سۋنامي تۋرالى ەسكەرتۋ كۋماموتو قالاسىنىڭ باتىس جاعالاۋىنداعى ارياكە شىعاناعىنا بەرىلدى. بۇل ايماق توكيودان وڭتۇستىك-باتىسقا قاراي 900 شاقىرىم جەردە ورنالاسقان. جاپونيا پرەمەر-مينيسترى ساناە تاكايچي X الەۋمەتتىك جەلىسىندەگى جازباسىندا تۇرعىنداردى جاعالاۋدان اۋلاق جۇرۋگە شاقىردى. ونىڭ ايتۋىنشا، بيىكتىگى 1 مەترگە جەتەتىن تولقىن كۇتىلۋدە. ۇكىمەت اقپارات جيناۋ، ىقتيمال زارداپتاردى باعالاۋ جانە قاجەت بولعان جاعدايدا قۇتقارۋ جۇمىستارىنا دايىندىق ءۇشىن ارنايى جەدەل توپ قۇردى.
«ءبىز ادامداردىڭ ءومىرىن ءبىرىنشى ورىنعا قويامىز»، – دەدى تاكايچي جانە قاتتى شايقالعان ايماقتارداعى تۇرعىنداردى كۇشتى سوققىلاردىڭ قاۋپىنە بايلانىستى ساقتىق شارالارىن ۇستانۋعا شاقىردى.
اگەنتتىكتىڭ جەر سىلكىنىسى جانە سۋناميگە قارسى ءىس-قيمىل جوسپارلاۋ ءبولىمىنىڭ باسشىسى سيندزي كيوموتو بريفينگتە بۇل جەر سىلكىنىسى ايماقتاعى سەيسميكالىق بەلسەندىلىكتى كۇشەيتىپ جاتقانىن، سوندىقتان الداعى ەكى-ۇش كۇندە تاعى ءبىر ءىرى جەر سىلكىنىسى بولۋى مۇمكىن ەكەنىن ەسكەرتتى. دەگەنمەن، ول قۇرلىقتاعى سىلكىنىستەن ازىرگە سۋنامي بايقالماعانىن جانە اگەنتتىك ەسكەرتۋدى جاقىن ارادا الىپ تاستاۋدى جوسپارلاپ وتىرعانىن ايتتى.
جاپونيانىڭ ءورت ءسوندىرۋ جانە اپاتتاردى باسقارۋ اگەنتتىگىنىڭ حابارلاۋىنشا، ايماقتاعى ءىرى قوعامدىق نىساندار مەن ينفراقۇرىلىمعا زيان كەلگەنى تۋرالى اقپارات جوق، ءبىراق بيلىك زارداپتاردىڭ كولەمىن ءالى انىقتاپ جاتىر.
جاپونيانىڭ اتوم ەنەرگياسىن رەتتەۋ اگەنتتىگى جەر سىلكىنىسىنەن جاقىن ماڭداعى ءۇش اتوم ەلەكتر ستانسياسىندا ەشقانداي اقاۋ انىقتالماعانىن مالىمدەدى.
كيۋسيۋداعى سينكانسەن جىلدام پويىزدارى مەن جەرگىلىكتى پويىزدار قاۋىپسىزدىك تەكسەرۋى ءۇشىن ۋاقىتشا توقتاتىلدى، ال اسو كۋماموتو اۋەجايىنىڭ ۇشۋ-قونۋ جولاعى جەر سىلكىنىسىنەن كەيىن جابىلدى. اۋەجاي سايتىنداعى حابارلاندىرۋعا سايكەس، ۇشۋ-قونۋ جۇمىستارىن قايتا باستاۋ مۇمكىندىگى جوق. جاپونيا قورعانىس مينيسترلىگى جاعدايدى باعالاۋ ءۇشىن ايماققا ۇشاقتار جىبەردى.
اقش گەولوگيالىق قىزمەتى الدىمەن جەر سىلكىنىسىنىڭ كۇشىن 7،1 بالل دەپ باعالاسا، كەيىن 6،8-گە تۇزەتتى. كۋماموتو 2016 جىلى 50-دەن استام ادام قازا تاۋىپ، 1800 ادام جارالانىپ، ونداعان مىڭ ءۇي قيراپ، زاقىمدانعان قايعىلى جەر سىلكىنىسىنە ۇشىراعان بولاتىن.