جاپونيانىڭ حوككايدو پرەفەكتۋراسىندا انالىق ايۋ قونجىعىن قورعاۋ ماقساتىندا توقتاپ تۇرعان كولىكتى بىرنەشە رەت سوققىلادى، دەپ حابارلايدى infohub.kz سايتى.
وقيعا تۇندە بيفۋكا ەلدى مەكەنىنىڭ ماڭىندا بولدى. جەڭىل كولىك تىزگىندەگەن 30 جاستاعى ايەل جولدا ەكى ايۋدى — ەرەسەك انالىق ايۋ مەن ونىڭ قونجىعىن — بايقاپ، كولىگىن بىردەن توقتاتتى. الايدا انالىق ايۋ كولىكتى ءقاۋىپ رەتىندە قابىلدادى.
بەينەجازبادا ءىرى جانۋاردىڭ كولىككە تاپ بەرىپ، كاپوتىنىڭ الدىڭعى بولىگىنە بىرنەشە رەت كۇشپەن سوعىلعانى كورىنەدى.
شابۋىل سالدارىنان كولىككە ايتارلىقتاي زاقىم كەلدى: كاپوتتا تەرەڭ مايىسقان ىزدەر، تىرناقتاردان قالعان سىزاتتار، ءتىپتى تەسىك پايدا بولدى. سالوندا وتىرعان ايەل زارداپ شەكپەدى. بىرنەشە سوققىدان كەيىن جابايى جانۋار قونجىعىمەن بىرگە ورمانعا قاشىپ كەتتى.
حوككايدو پوليسياسى جەرگىلىكتى تۇرعىندار مەن جۇرگىزۋشىلەردى قاۋىپتەن ساقتاندىرۋ ءۇشىن بەينەجازبانى جاريالادى. كۇزدە جابايى ايۋلار قىسقى ۇيقىعا جاتار الدىندا ازىق ىزدەپ، اسىرەسە بەلسەندى بولادى. بيلىك تاۋلى ايماقتاعى پاترۋلدەۋدى كۇشەيتۋگە ءماجبۇر بولدى، ال اۆتوكولىك جۇرگىزۋشىلەرىنە قاراڭعى ۋاقىتتا جول جۇرگەندە ەرەكشە ساق بولۋ ۇسىنىلادى.