جاپونيانىڭ شىعىسىندا بولعان «تەڭدەسى جوق» نوسەر سالدارىنان كەمىندە ءتورت ادام قازا تاۋىپ، توكيوداعى ناريتا اۋەجايىندا 7 مىڭعا جۋىق ادام قامالىپ قالدى. تاعى مىڭداعان ادام مەملەكەتتىك عيماراتتارعا پانالاۋعا ءماجبۇر بولدى. بۇل تۋرالى infohub.kz سايتى حابارلايدى.
بەيسەنبى كۇنى تۇندە توكيونىڭ شىعىسىنداعى چيبا پرەفەكتۋراسىندا نوسەر جاڭبىر جاۋىپ، كوشكىن ءقاۋپى مەن ەلەكتر جارىعىنىڭ سونۋىنە سەبەپ بولدى. چيبا جانە باسقا ايماقتاردا 400 مىڭنان استام ادامعا ەۆاكۋاسيا تۋرالى بۇيرىق بەرىلدى، شامامەن 45 مىڭ ءۇي جارىقسىز قالدى. ساعاتىنا 115 ميلليمەتر جاڭبىر جاۋدى — بۇل تامىز ايىنداعى ورتاشا ايلىق مولشەرمەن بىردەي.
جاپونيا مەتەورولوگيالىق اگەنتتىگى وسى پرەفەكتۋرا ءۇشىن نوسەر مەن كوشكىن قاۋپىنە بايلانىستى ەڭ جوعارى 5-دەڭگەيلى ەسكەرتۋدى العاش رەت جاريالادى.
يچيكاۆا قالاسىندا سۋ باسقان جولدا 60-70 جاس شاماسىنداعى ەر ادامنىڭ دەنەسى تابىلدى، ال ساكۋرا قالاسىندا كولىگى سۋ استىندا قالعان 66 جاستاعى ايەل قازا تاپتى. تاعى ەكى ادام سۋ تاسقىنى كەزىندە كولىكتەرىنەن شىعا الماي قازا تاپقانى حابارلاندى. قۇتقارۋ جۇمىستارىنا اسكەريلەر جۇمىلدىرىلدى.
«بۇل وتە ەرەكشە جاعداي»، — دەدى چيبا گۋبەرناتورى توسيحيتو كۋماگاي جۇما كۇنى تاڭەرتەڭ جۋرناليستەرگە. «مەن بۇرىن كوپتەگەن اپاتتارعا تاپ بولدىم، ءبىراق مۇنداي جاعدايدى ەشقاشان كورمەپپىن».
توكيونىڭ نەگىزگى حالىقارالىق اۋەجايلارىنىڭ ءبىرى ناريتادا شامامەن 7 مىڭ جولاۋشى ءتۇندى وتكىزدى، ال 1700 ادام چيبا پرەفەكتۋراسىنىڭ عيماراتىنان پانا تاپتى.
قوعامدىق تەلەارنا NHKء-دىڭ كادرلارىندا چيبانىڭ ورتالىق اۋدانىنداعى كارىز ليۋگىنەن سۋ اتقىلاپ، جاقىن ماڭداعى بەس قاباتتى عيماراتتان بيىككە كوتەرىلگەنى كورىندى.
جۇما كۇنى جاڭبىر باسىلدى، ءبىراق بيلىك ايماقتا سۋ تاسقىنى ءقاۋپى تۋرالى ەسكەرتۋدە.
«سۋ تاسقىنى ءقاۋپى جوعارى وزەندەردە ءومىرىڭىزدى قورعاۋ ءۇشىن بارلىق شارانى قولدانىڭىز»، — دەدى جەر، ينفراقۇرىلىم، كولىك جانە تۋريزم مينيسترلىگىنىڭ وكىلى كادزۋحيتو شيماموتو. «سونداي-اق سۋ تاسقىنى ءقاۋپى ودان ءارى ارتۋى مۇمكىن وزەندەر بار، سوندىقتان جەرگىلىكتى اكىمدىكتەردىڭ ەۆاكۋاسيا تۋرالى ەسكەرتۋلەرىن تەكسەرىپ، الدىن الا ەۆاكۋاسيالانىڭىز».
جاپونيانىڭ مەتەورولوگتارى كليماتتىڭ وزگەرۋى ەكسترەمالدى اۋا رايى وقيعالارىنىڭ جيىلىگى مەن قارقىندىلىعىن ارتتىرىپ جاتقانىن ايتادى.