جاپونيادا وكيناۆا ارالىندا جەرگىلىكتى تۇرعىندى توناپ، ءولتىردى دەگەن كۇدىكپەن امەريكالىق تەڭىز جاياۋ اسكەرى ۇستالدى، دەپ حابارلايدى infohub.kz سايتى.
CNNء-نىڭ مالىمەتىنشە، جەكسەنبى كۇنى جاپونياداعى ءقوناقۇي نومىرىندە اقش تەڭىز جاياۋ اسكەرى كورپۋسىنىڭ اسكەري قىزمەتشىسى جەرگىلىكتى تۇرعىندى ءولتىردى جانە تونادى دەگەن كۇدىكپەن ۇستالعان. وكيناۆا پوليسياسىنىڭ دەرەگىنشە، سەنبى كۇنى تاڭەرتەڭ وكيناۆا ارالىنداعى ناحا قالاسىنداعى ءقوناقۇي نومىرىنەن 39 جاستاعى ايەلدىڭ ءولى دەنەسى تابىلعان؛ ول وقيعا ورنىندا كوز جۇمعان.
پوليسيا CNN-گە ايەلدىڭ دەنەسىنىڭ جاي-كۇيىنە قاراعاندا، ول ولتىرىلگەن بولۋى مۇمكىن ەكەنىن حابارلادى.
پوليسيا 20 جاستاعى تەڭىز جاياۋ اسكەرىنىڭ دە سول ارالدا ورنالاسقان فۋتەنما اۋە بازاسىندا قىزمەت ەتكەنىن قوستى. بەينەباقىلاۋ كامەرالارىنىڭ جازبالارىندا قىرىنعان باسى بار، شەتەلدىك بولۋى مۇمكىن ەر ادامنىڭ ايەلمەن بىرگە ءقوناقۇي نومىرىنە كىرىپ، كەيىن ونىڭ زاتتارىن الىپ، عيماراتتان شىعىپ كەتكەنى كورىنەدى.
جاپونياداعى اقش ەلشىلىگى وقيعانى X الەۋمەتتىك جەلىسىندە ءتۇسىندىردى. «وكيناۆا پرەفەكتۋراسىندا جاپون ازاماتىنىڭ قازا تابۋىنا بايلانىستى اقش اسكەري قىزمەتشىسىنىڭ ۇستالعانىنان حاباردارمىز. امەريكا قۇراما شتاتتارى ۇكىمەتىنىڭ اتىنان مارقۇمنىڭ وتباسىنا شىن جۇرەكتەن كوڭىل ايتامىز. قازىرگى تاڭدا بولعان جاعدايدىڭ بارلىق ءمان-جايىن انىقتاۋ ءۇشىن تەرگەۋ ءجۇرىپ جاتىر، ال اقش ۇكىمەتى جاپونيا ۇكىمەتىمەن جانە جەرگىلىكتى بيلىكپەن تىعىز ىنتىماقتاستىقتا كومەك كورسەتۋدى جالعاستىرۋدا»، — دەلىنگەن حابارلامادا.
جاپونيا پرەمەر-مينيسترى ساناە تاكايتي X الەۋمەتتىك جەلىسىندە جاپونيا امەريكان تاراپىنا قاتاڭ نارازىلىق بىلدىرەتىنىن مالىمدەدى. «وكيناۆا پرەفەكتۋراسىنىڭ ناحا قالاسىندا بولعان توناۋ جانە ءولتىرۋ ىسىندە زارداپ شەككەن ادامنىڭ قازا تابۋىنا بايلانىستى كوڭىل ايتامىن جانە وتباسىنا جاناشىرلىق سوزدەرىمدى جەتكىزەمىن. بۇل وقيعاعا كەلەتىن بولساق، وكيناۆا پرەفەكتۋراسى پوليسياسىنىڭ تەرگەۋى جالعاسۋدا، الايدا بۇگىن مەن اقش تەڭىز جاياۋ اسكەرى كورپۋسى اسكەري قىزمەتشىسىنىڭ ۇستالعانىن ءبىلدىم. وسىنشالىقتى قاتىگەز جانە ارامزا سيپاتتاعى وقيعا قاتتى وكىنىش تۋدىرادى. جاپونيا ۇكىمەتى امەريكان تاراپىنا قاتاڭ نارازىلىق بىلدىرەدى. ءبىز تەرگەۋگە بارىنشا جاردەمدەسۋدى، اقش اسكەري قىزمەتشىلەرى اراسىندا ءتارتىپتى قاتاڭ ساقتاۋدى جانە وسىنداي وقيعالاردىڭ قايتالانۋىن بولدىرماۋدى تالاپ ەتەمىز. ۇكىمەت بولعان جاعدايعا ءتيىستى دەن قويۋدى قامتاماسىز ەتۋ ءۇشىن بارلىق كۇش-جىگەرىن جۇمسايدى»، — دەلىنگەن پرەمەر-مينيستردىڭ مالىمدەمەسىندە.