جاپوندىق PorMedTec ستارتاپى ەلدە العاش رەت ادامدارعا شوشقا بۇيرەگىن اۋىستىرىپ سالۋ بويىنشا كلينيكالىق سىناقتاردى 2028 جىلى باستاۋدى جوسپارلاپ وتىر، دەپ حابارلايدى infohub.kz سايتى.
عالىمدار ورگانداردىڭ قابىلدانباۋ ءقاۋپىن ازايتۋ ءۇشىن دنق-دا 69 وزگەرىسى بار گەنەتيكالىق وزگەرتىلگەن شوشقالاردى ءوسىرىپ جاتىر. العاشقى سىناقتاردى 2028 جىلى باستاۋ جوسپارلانسا، 2033 جىلعا قاراي مۇنداي اۋىستىرىپ سالۋلار جاپونيادا ستاندارتتى ەمدەۋ ادىسىنە اينالادى دەپ كۇتىلۋدە.
«ءبىز مۇنى اۋىر بۇيرەك جەتكىلىكسىزدىگىمەن اۋىراتىن ناۋقاستار ءۇشىن ادامنان ادامعا ورگان ترانسپلانتاسياسى جانە دياليزبەن قاتار ەمدەۋ نۇسقاسى رەتىندە ىلگەرىلەتكىمىز كەلەدى»، — دەدى ستارتاپ پرەزيدەنتى گەندزيرو ميۆا.
ونىڭ ايتۋىنشا، 2027 قارجى جىلىنىڭ سوڭىنا قاراي اۋرۋحانالارعا جاقىن جەردە شوشقا بۇيرەكتەرىن الۋ ورتالىقتارى قۇرىلادى. ستارتاپ 2030 جىلى ادامعا شوشقا بۇيرەگىن ترانسپلانتاسيالاۋعا شارتتى رۇقسات الۋدى جانە 2033 جىلعا قاراي بۇل پروسەدۋرانى ستاندارتتى ەمدەۋ ادىسىنە اينالدىرۋدى جوسپارلاپ وتىر.
بۇعان دەيىن قىتايلىق دارىگەرلەر الەمدە العاش رەت ادامعا گەنەتيكالىق موديفيكاسيالانعان شوشقانىڭ ءۇش مۇشەسىن – باۋىر مەن ەكى بۇيرەكتى بىردەن اۋىستىرىپ سالدى. اۋىستىرىپ سالىنعاننان كەيىن بارلىق ءۇش مۇشە بىردەن جۇمىس ىستەي باستادى: باۋىر ءبىر تاۋلىكتەن از ۋاقىتتا ءوت بولە باستاسا، بۇيرەكتەر دەرەۋ ءوز قىزمەتىن اتقارا باستادى.
2022 جىلى اقش-تا ناۋقاسقا العاش رەت گەنەتيكالىق موديفيكاسيالانعان شوشقانىڭ جۇرەگى اۋىستىرىلىپ سالىندى. ەر ادام وپەراسيادان كەيىن ەكى اي ءومىر ءسۇردى. 2024 جىلى امەريكاندىق حيرۋرگتەر ءتىرى ادامعا العاش رەت شوشقا بۇيرەگىن اۋىستىرىپ سالدى.