جاپونيانىڭ وڭتۇستىگىندەگى كۋماموتو پرەفەكتۋراسىندا بولعان 7،1 بالدىق جەر سىلكىنىسى سالدارىنان ساۋدا ورتالىعىندا ادامدار قامالىپ قالدى، دەپ حابارلايدى infohub.kz.
جەرگىلىكتى ءورت ءسوندىرۋ قىزمەتىنىڭ مالىمدەۋىنشە، كاسيما قالاسىنداعى ساۋدا كەشەنىنىڭ ەكىنشى قاباتى قۇلاپ، ىشىندە كوپتەگەن ادامدار قامالىپ قالعان. پوليسيا كۋماموتو ايماعىنداعى Aeon Mall ساۋدا ورتالىعىنان جارىلىس بولعانى تۋرالى حابارلاما العانىن، ءبىراق قوسىمشا مالىمەت بەرە الماعانىن ايتتى.
جاپونيا مەتەورولوگيا اگەنتتىگىنىڭ (JMA) مالىمەتى بويىنشا، جەر سىلكىنىسىنىڭ وشاعى 10 كم تەرەڭدىكتە بولىپ، جەرگىلىكتى ۋاقىتپەن 16:27-دە تىركەلگەن. ءدۇمپۋ جاپونيانىڭ سيندو شكالاسى بويىنشا ەڭ جوعارعى 7 بالل دەڭگەيىندە بولدى. العاشىندا بيىكتىگى 1 مەتر سۋنامي تۋرالى ەسكەرتۋ جاسالعان، كەيىن ول الىنىپ تاستالدى.
حالىقارالىق اتوم ەنەرگياسى اگەنتتىگى (حاەب) جاپونيانىڭ يادرولىق رەتتەۋ ورگانى سەنداي اتوم ەلەكتر ستانسياسىندا جەر سىلكىنىسىنەن كەيىن ەشقانداي زاقىم نەمەسە قاۋىپسىزدىك ماسەلەسى جوق ەكەنىن حابارلاعانىن مالىمدەدى. حاەب جاعدايدى باقىلاۋدى جالعاستىراتىنىن ايتتى.
جاپونيا پرەمەر-مينيسترى ساناە تاكايچي جەر سىلكىنىسىنەن كەيىن ارياكە شىعاناعى مەن ياتسۋشيرو تەڭىزىنە سۋنامي ەسكەرتۋى جاريالانعانىن راستادى. «بۇگىن ساعات 16:27 شاماسىندا كۋماموتو پرەفەكتۋراسىنىڭ كۋماموتو ايماعىندا جەر سىلكىنىسى بولدى، ۋكي قالاسى مەن ماكيگاۆا كەنتىندە ماكسيمالدى 7 باللدىق قاتتى ءدۇمپۋ سەزىلدى. وسى جەر سىلكىنىسىنە بايلانىستى ارياكە شىعاناعى مەن ياتسۋشيرو تەڭىزىنە سۋنامي ەسكەرتۋى جاريالانىپ، شامامەن 1 مەترلىك سۋنامي كۇتىلۋدە. جاعالاۋعا جاقىنداماۋىڭىزدى سۇرايمىن. ۇكىمەت جەر سىلكىنىسىنەن كەيىن بىردەن پرەمەر-مينيستر كەڭسەسىندە داعدارىس ورتالىعى قۇرىپ، ءتيىستى مينيسترلىكتەر مەن ۆەدومستۆولاردىڭ باسقارما باستىقتارى دەڭگەيىندە توتەنشە جاعدايلار توبىن شاقىرىپ، زارداپتاردى انىقتاۋ، ادام ءومىرىن ساقتاۋ جانە قۇتقارۋ بويىنشا توتەنشە تابيعي اپاتقا قارسى شارالاردى تولىق قولعا الدى»، — دەدى ول.
پرەمەر-مينيستر مينيسترلىكتەر مەن ۆەدومستۆولارعا زارداپتاردى جەدەل انىقتاۋدى، جەرگىلىكتى بيلىكپەن تىعىز ۇيلەستىرۋدى جانە ادام ءومىرىن ءبىرىنشى ورىنعا قويۋدى، سونداي-اق سۋنامي مەن زارداپتار تۋرالى جۇرتشىلىققا ۋاقتىلى جانە ءدال اقپارات بەرۋدى تاپسىردى. قاتتى ءدۇمپۋ سەزىلگەن ايماقتاردىڭ تۇرعىندارىن ءدال وسىنداي كۇشتى جەر سىلكىنىستەرىنىڭ قايتالانۋىنا ساق بولۋعا شاقىردى.
جاپونيا ۇكىمەتى كۋماموتو، ناگاساكي، كاگوسيما، فۋكۋوكا، ساگا، ويتا جانە ميادزاكي پرەفەكتۋرالارىنا توتەنشە جەر سىلكىنىسى ەسكەرتۋىن جاريالادى. بۇل ايماقتاردىڭ ءبارى ەلدىڭ وڭتۇستىگىندەگى كيۋسيۋ ارالىندا ورنالاسقان.
جاپونيا — الەمدەگى ەڭ سەيسميكالىق بەلسەندى ەلدەردىڭ ءبىرى، تىنىق مۇحيتىنىڭ «وت ساقيناسى» بويىندا ءتورت ءىرى تەكتونيكالىق پليتانىڭ ۇستىندە ورنالاسقان. ەل جىلىنا شامامەن 1500 جەر سىلكىنىسىن باستان كەشىرەدى، ونىڭ كوبى جەڭىل، ءبىراق كەيبىرى اپاتتى بولادى. 2011 جىلدىڭ ناۋرىزىنداعى اپاتتى جەر سىلكىنىسى مەن سۋنامي 18 000-نان استام ادامنىڭ ءومىرىن قيىپ، فۋكۋسيما-داييچي اتوم ستانسياسىندا ءۇش رەاكتوردىڭ بالقۋىنا اكەلىپ سوقتىردى.
2016 جىلى كۋماموتو پرەفەكتۋراسىندا 6،5 جانە 7،3 بالدىق ەكى كۇشتى جەر سىلكىنىسى بولىپ، 273 ادام قازا تاۋىپ، 2 800-دەن استام ادام جاراقات العان ەدى.