جەتىسۋ وبلىسىندا جۇرگىزۋشى بوتەن مەملەكەتتىك ءنومىردى پايدالانعانى ءۇشىن 5 تاۋلىككە قامالىپ، ءبىر جىلعا كولىك جۇرگىزۋ قۇقىعىنان ايىرىلدى، دەپ حابارلايدى infohub.kz.
ءىىم اقپاراتتىق مەدياپورتالىنىڭ مالىمەتىنشە، جاركەنتتە پوليسيا قىزمەتكەرلەرى باسقا كولىككە تيەسىلى مەملەكەتتىك تىركەۋ نومىرىمەن جۇرگەن كولىكتى انىقتاعان.
انىقتالعانداي، Audi 100 كولىگىنىڭ جۇرگىزۋشىسى ءوز اۆتوكولىگىنە Toyota Camryء-دىڭ مەملەكەتتىك تىركەۋ ءنومىرىن ورناتىپ، قالا كوشەلەرىندە جۇرگەن. بۇل بۇزۋشىلىقتى پوليسيا قىزمەتكەرلەرى انىقتاعان. كولىك توقتاتىلىپ، جۇرگىزۋشى جاۋاپكەرشىلىككە تارتىلىپ، ماتەريالدار سوتقا جىبەرىلدى.
ءىستى قاراۋ ناتيجەسىندە پانفيلوۆ اۋداندىق سوتى جۇرگىزۋشىنى كىنالى دەپ تانىپ، وعان 5 تاۋلىككە اكىمشىلىك قاماۋعا الۋ جازاسىن تاعايىندادى. سونىمەن قاتار، ەر ادام ءبىر جىلعا كولىك جۇرگىزۋ قۇقىعىنان ايىرىلدى. جالعان مەملەكەتتىك تىركەۋ ءنومىرى الىنىپ، بەلگىلەنگەن تارتىپپەن جويىلۋعا ءتيىس.