جاركەنتتىڭ تاتتىگە اۋەس قايتالانعان ۇرىسى ءبىر اي ىشىندە دۇكەننەن 600-دەن استام شوكولاد ۇرلاپ، 530 مىڭ تەڭگەدەن استام شىعىن كەلتىرگەن، دەپ حابارلايدى infohub.kz.
جەتىسۋ پوليسياسىنا قالاداعى ساۋدا ورتالىقتارىنىڭ ءبىرىنىڭ وكىلى «راحات قازاقستان» شوكولادىنىڭ ۇنەمى جوعالىپ جاتقانى تۋرالى ارىزبەن جۇگىنگەن. بەينەباقىلاۋ كامەرالارىنىڭ جازبالارىن زەردەلەي كەلە، كۇزەت قىزمەتى ۇرلىققا ءبىر ەر ادامنىڭ قاتىسى بارىن انىقتاعان.
ۇرى بەلگىلەنگەن سحەما بويىنشا ارەكەت ەتكەن: دۇكەنگە كەلىپ، ەشكىم بايقامايتىنىنا كوز جەتكىزىپ، شوكولادتى سومكەسى مەن قالتاسىنا جاسىرىپ، تولەمەي كەتىپ قالعان. بىرنەشە مينۋتتان كەيىن قايتا ورالىپ، ارەكەتىن قايتالاعان. كەيبىر كۇندەرى ول مۇنداي ارەكەتتى بەس-التى رەت قايتالاعان.
وسىلايشا ءبىر اي ىشىندە ساۋدا ورتالىعىنان 625 پليتكا شوكولاد جوعالعان. جالپى شىعىن سوماسى 530 مىڭ تەڭگەدەن اسقان.
«پانفيلوۆ اۋداندىق پوليسيا ءبولىمىنىڭ قىزمەتكەرلەرى جاركەنتتىڭ 41 جاستاعى تۇرعىنىن انىقتاپ، بولىمشەگە جەتكىزدى. ەر ادام كىناسىن تولىق مويىندادى. وسى فاكتى بويىنشا سوتقا دەيىنگى تەرگەۋ جۇرگىزىلۋدە. وقيعانىڭ بارلىق ءمان-جايى انىقتالۋدا»، — دەپ حابارلادى جەتىسۋ وبلىستىق پوليسيا دەپارتامەنتىندە.
بۇعان دەيىن Kursiv LifeStyle «قازاقستان» شوكولادىنىڭ قاپتاماسى جاڭا تىيىمعا بايلانىستى وزگەرەتىنىن جازعان بولاتىن. ەسكە سالايىق، مەملەكەتتىك تۋىمىزدى كوممەرسيالىق جانە جارنامالىق ماقساتتا پايدالانۋعا تىيىم سالىندى، ال تۇرعىن ۇيلەردە ونى بەلگىلى ءبىر بۇرىشپەن ورنالاستىرۋعا بولادى.