كاليفورنيا تاۋلارىندا ءبىر توپ الپينيست جاساندى ينتەللەكتتىڭ قاتە كەڭەسى سالدارىنان ءقاۋىپتى جاعدايعا تاپ بولدى، دەپ حابارلايدى infohub.kz سايتى.
تۋريستەر سيسكيۋ وكرۋگىندەگى شاستا تاۋىنا شىعۋدى جوسپارلاپ، Google Gemini چات-بوتىنىڭ كەڭەسىنە تولىق سەنىم ارتقان. جاساندى ينتەللەكت ولاردى شىڭعا شىعۋ نەبارى سەگىز ساعات ۋاقىت الاتىنىنا سەندىرىپ، قۇرامىندا قاراپايىم كومىرسۋلار بار جەڭىل تاعامدار الۋدى ۇسىنعان. ناتيجەسىندە الپينيستەر جىلى كيىمسىز جانە تۇنەۋ قۇرالدارىنسىز، كىشكەنتاي ريۋكزاكتارمەن جولعا شىققان.
الايدا كوتەرىلۋ ۋادە ەتىلگەن سەگىز ساعاتتىڭ ورنىنا 16 ساعاتقا سوزىلعان. ولار شىڭعا كۇن باتقاننان كەيىن عانا جەتكەن، ال قايتار جولدا مارشرۋتتان اداسقان. جاعدايدى سمارتفوننىڭ زاريادى تاۋسىلىپ، بايلانىس پەن ناۆيگاسياسىز قالۋى ودان ءارى قيىنداتقان. ولار قۇتقارۋشىلاردى شاقىرۋعا ءماجبۇر بولعان، ءبىراق قولايسىز اۋا رايىنا بايلانىستى تىكۇشاقپەن ەۆاكۋاسيالاۋ مۇمكىن بولماعان.
ىزدەۋ-قۇتقارۋ قىزمەتى اقش ورمان قىزمەتىمەن بىرلەسىپ، الپينيستەردى جاياۋ 9 ساعات بويى قۇتقارعان. جورىققا قاتىسۋشىلار جاساندى ينتەللەكتكە تىم سەنىپ، سىني ويلاۋدى ەلەمەگەندەرىن مويىنداعان. جەرگىلىكتى ساراپشىلار مارشرۋتتاردى رەيندجەرلەردەن ناقتىلاۋدى جانە ەكسترەمالدى ءىس-شارالاردى جوسپارلاۋ ءۇشىن چات-بوتتاردى پايدالانباۋدى قاتاڭ ۇسىنادى.