1 قىركۇيەكتەن باستاپ قازاقستاندا اۋىل مەكتەپتەرىنە جاساندى ينتەللەكت ەنگىزۋ جونىندەگى پيلوتتىق جوبا باستالدى. العاشقى كەزەڭدە ول پاۆلودار جانە قىزىلوردا وبلىستارىنداعى 10 وقۋ ورنىن قامتىدى. بۇل تۋرالى Q.AI باس ديرەكتورى دميتري مۋن ايتتى، دەپ حابارلايدى infohub.kz سايتى.
ونىڭ ايتۋىنشا، جاساندى ينتەللەكت شاعىن جيناقتى مەكتەپتەردەگى وقۋشىلاردىڭ جاۋاپتارىن تالداپ، بىلىمدەگى ولقىلىقتاردى انىقتايدى. 2028 جىلدىڭ شىلدەسىنە قاراي جوبانى 2،5 مىڭ شاعىن جيناقتى مەكتەپكە تاراتۋ جوسپارلانۋدا.
جاساندى ينتەللەكت ماتەماتيكا، سيفرلىق ساۋاتتىلىق، قازاق جانە ورىس تىلدەرى ساباقتارىندا قولدانىلادى.
وقۋ ۇدەرىسى گيبريدتى سحەما بويىنشا قۇرىلعان: استاناداعى بىلىكتى مۇعالىمدەر ارنايى جابدىقتالعان ستۋديادان ونلاين رەجيمدە ساباق وتكىزەدى، ال اۋىل مۇعالىمدەرى سىنىپتا ساباق بارىسىن سۇيەمەلدەپ، بالالارعا ماتەريالدى مەڭگەرۋگە كومەكتەسەدى. وقۋشىلاردىڭ بەلسەندىلىگى مەن قاتىسۋىن ينتەراكتيۆتى كليكەرلەر مەن سيفرلىق قۇرالدار ارقىلى باقىلايدى.
«بۇل رەتتە ءمۇعالىم سىنىپتا بالالاردىڭ جانىندا بولادى، ال جاساندى ينتەللەكت وقۋشىلاردىڭ جاۋاپتارىن تالداپ، بىلىمدەگى ولقىلىقتار مەن ءالسىز تۇستاردى تابۋعا جانە كىمگە قوسىمشا كومەك كەرەك ەكەنىن تۇسىنۋگە كومەكتەسەدى. ياعني ءبىز دەربەستەندىرىلگەن ءبىلىم بەرۋگە كوشەمىز»، — دەدى Q.AI باسشىسى.
مۋن جاساندى ينتەللەكت ءمۇعالىمدى الماستىرمايدى، كەرىسىنشە ونى كۇشەيتىپ، تيىمدىرەك ەتەدى دەپ قورىتىندىلادى.
بۇعان دەيىن «كۋرسيۆ» استانادا قازاق-قىتاي جاساندى ينتەللەكت مەكتەبى اشىلۋى مۇمكىن ەكەنىن جازعان بولاتىن.