ميۋنحەندەگى ماكس پلانك اتىنداعى پسيحياتريا ينستيتۋتىنىڭ عالىمدارى حالىقارالىق ارىپتەستەرىمەن بىرلەسىپ، ميگرەن ۇستاماسىن ءبىر كۇن بۇرىن 91 پايىزعا دەيىنگى دالدىكپەن بولجاي الاتىن جاساندى ينتەللەكت الگوريتمىن جاساپ شىقتى. زەرتتەۋ ناتيجەلەرى Nature Medicine عىلىمي جۋرنالىندا جاريالاندى، دەپ حابارلايدى infohub.kz سايتى.
اۋقىمدى ەكسپەريمەنتكە سوزىلمالى نەمەسە ءجيى ميگرەنمەن اۋىراتىن 1014 ادام قاتىستى. بىرنەشە اي بويى ەرىكتىلەر تاعاتىن قۇرىلعىلاردى پايدالانىپ، ءموبيلدى قوسىمشاداعى ارنايى كۇندەلىكتەردى تۇراقتى تولتىرىپ وتىردى. سيفرلىق سەنسورلار ۇيقى ساپاسىن، دەنە بەلسەندىلىگىنىڭ دەڭگەيىن، جۇرەك ىرعاعىنىڭ وزگەرگىشتىگىن، جۇرەك سوعىسىن جانە باسقا دا فيزيولوگيالىق كورسەتكىشتەردى تىركەدى.
جاسالعان تەرەڭ وقىتۋ مودەلى بيومەتريالىق دەرەكتەردەگى باس اۋرۋى باستالۋىنىڭ الدىندا پايدا بولاتىن جەكە زاڭدىلىقتاردى انىقتاي الدى. نەگىزگى ءقاۋىپ فاكتورلارى رەتىندە ۇيقىنىڭ بۇزىلۋى، سترەسس دەڭگەيىنىڭ كۇرت وزگەرۋى جانە دەنە بەلسەندىلىگىنىڭ اۋىتقۋى بەلگىلى بولدى. الگوريتم جوعارى ناتيجە كورسەتتى: سەزىمتالدىعى 87 پايىز، دالدىگى 91 پايىز.
دوكتور فلوريان حولسينگەر باستاعان جۇمىس اۆتورلارى ميگرەن ءقاۋپى تۋرالى ەرتە ەسكەرتۋ پاسيەنتتەرگە ۇستامانى بولدىرماۋ نەمەسە جەڭىلدەتۋ ءۇشىن پروفيلاكتيكالىق دارىلەردى ۋاقىتىندا قابىلداۋعا نە كۇن ءتارتىبىن وزگەرتۋگە مۇمكىندىك بەرەتىنىن اتاپ ءوتتى. جاقىن ارادا زەرتتەۋشىلەر وسى الگوريتم نەگىزىندە كۇندەلىكتى قولدانۋعا ارنالعان ءموبيلدى قوسىمشا جاساۋعا كىرىسپەك.