ستەنفورد ۋنيۆەرسيتەتىنىڭ زەرتتەۋشىلەرى قالالىق ورتانىڭ جاياۋ جۇرگىنشىلەرگە ىڭعايلىلىعى مەن ساياباقتاردىڭ بولۋى ادامداردىڭ كۇندەلىكتى فيزيكالىق بەلسەندىلىگىنە ولاردىڭ جەكە ىنتاسىنان گورى كۇشتىرەك اسەر ەتەتىنىن انىقتادى، دەپ حابارلايدى infohub.kz سايتى.
كلينيكالىق پسيحولوگ، پروفەسسور ەببي كينگتىڭ جەتەكشىلىگىمەن جۇرگىزىلگەن عىلىمي جۇمىس قالالىق كەڭىستىكتىڭ ەرەكشەلىكتەرى تۇرعىنداردىڭ مىنەز-قۇلقىن تىكەلەي انىقتايتىنىن كورسەتتى. جابدىقتالعان تروتۋارلار، ساپالى جارىقتاندىرۋ، ورىندىقتار، سونداي-اق جاقىن ماڭداعى دۇكەندەر، كافەلەر مەن كىتاپحانالار ادامداردى جاياۋ، ۆەلوسيپەدپەن نەمەسە اربامەن ءجيى قوزعالۋعا ىنتالاندىرادى.
زەرتتەۋ دەرەكتەرىنە سايكەس، جاياۋ جۇرگىنشىلەر ينفراقۇرىلىمى جاقسى دامىعان اۋدانعا كوشۋ ادامدارعا كۇنىنە شامامەن 1100 قادام ارتىق جۇرۋگە مۇمكىندىك بەرەدى، بۇل اپتاسىنا قوسىمشا ءبىر ساعات بەلسەندىلىككە تەڭ. بۇل جۇرەك-قان تامىر اۋرۋلارى، گيپەرتونيا، قانت ديابەتى جانە دەپرەسسيانىڭ دامۋ ءقاۋپىن ايتارلىقتاي تومەندەتەدى.
جاعدايدى وزگەرتۋ ءۇشىن عالىمدار توبى «ءبىزدىڭ داۋىس» (Our Voice) جوباسىن ىسكە قوستى. بۇل جوبا تۇرعىندارعا ءموبيلدى قوسىمشا ارقىلى ءوز اۋداندارىنداعى پروبلەمالىق جەرلەردى بەلگىلەپ، بۇل دەرەكتەردى قالا بيلىگىنە جەتكىزۋگە مۇمكىندىك بەرەدى. باستاما ءقازىردىڭ وزىندە اقش-تىڭ 30-دان استام شتاتىن جانە الەمنىڭ 30-دان استام ەلىن قامتىدى.