قازاقستاندا جەدەل جاردەم كولىكتەرىن جەتكىزۋ مەرزىمىنە بايلانىستى تۋىنداعان داۋ سوتتا قارالىپ جاتىر، دەپ حابارلايدى infohub.kz سايتى.
ازاماتتىق ىستەر جونىندەگى كاسساسيالىق سوتتىڭ مالىمەتىنشە، جانجال مەملەكەتتىك كوممۋنالدىق كاسىپورىن مەن ج ش س اراسىندا مەملەكەتتىك ساتىپ الۋ شارتىن ورىنداۋ كەزىندە تۋىنداعان. كەلىسىمشارتتا جەدەل جاردەم كولىكتەرىن جەتكىزۋ مەرزىمى 30 كۇنتىزبەلىك كۇن دەپ بەلگىلەنگەن، الايدا زاڭناما وتاندىق وندىرۋشىلەر ءۇشىن ەڭ از مەرزىمدى 60 كۇننەن كەم ەمەس دەپ بەلگىلەيدى.
2025 جىلعى 12 تامىزدا تاراپتار 20 جەدەل جاردەم كولىگىن جەتكىزۋگە شارتقا قول قويىپ، ونى 2025 جىلعى 25 قىركۇيەككە دەيىن ورىنداۋ كەرەك ەدى. الايدا 14 قازاندا تاپسىرىس بەرۋشى مەرزىمنىڭ بۇزىلۋىن سىلتاۋراتىپ، شارتتى ءبىرجاقتى تارتىپتە بۇزدى. ءبىرىنشى جانە اپەللياسيالىق ساتىداعى سوتتار تالاپ قويۋدى قاناعاتتاندىرۋدان باس تارتىپ، كونكۋرس قايتا وتكىزىلگەنىن، قۇجاتتاما وزگەرمەگەنىن، سوندىقتان 60 كۇندىك مەرزىم تۋرالى جاڭا ەرەجەلەر قولدانىلمايدى دەپ شەشتى.
كاسساسيالىق سوت بۇل ۇستانىممەن كەلىسپەدى. ول ج ش س وتاندىق ءوندىرۋشى ەكەنىن جانە شارت قازاقستاندىق تاۋار وندىرۋشىلەر ءۇشىن ەڭ از جەتكىزۋ مەرزىمىن 60 كۇننەن كەم ەمەس دەپ بەلگىلەيتىن وزگەرىستەر كۇشىنە ەنگەننەن كەيىن جاسالعانىن انىقتادى. قايتالاما ساتىپ الۋلاردى وتكىزۋ تاپسىرىس بەرۋشىنى شارتقا قول قويۋ كەزىندە قولدانىستا بولعان زاڭنىڭ مىندەتتى تالاپتارىن ساقتاۋدان بوساتپايدى. ەرەجەلەر قايتالاما ساتىپ الۋلار كەزىندە دە كەلىسىمشارتتى ورىنداۋ مەرزىمىن ۇلعايتۋعا مۇمكىندىك بەرەدى.
تاراپتاردىڭ حات الماسۋىنان كورىنىپ تۇرعانداي، جەتكىزۋشى مىندەتتەمەلەردى ورىنداۋعا جانە تاۋاردى تولىق جەتكىزۋگە دايىن بولعان، ءبىراق تاپسىرىس بەرۋشى شارتتىڭ بۇزىلعانىن العا تارتىپ، ونى قابىلداۋدان باس تارتقان. ناتيجەسىندە تومەنگى ساتىداعى سوت اكتىلەرى جويىلىپ، ءجشس-تىڭ تالاپ ارىزىن قاناعاتتاندىرۋ تۋرالى جاڭا شەشىم شىعارىلدى.