الماتى تۇرعىندارى جەر استى ءدۇمپۋىن سەزىپ، پرەزيدەنتتىك حابارلاما العان سوڭ، كوپشىلىگى عيماراتتار مەن پاتەرلەرىن تاستاپ شىقتى. الەۋمەتتىك جەلىلەردە 12-قاباتتان، سونداي-اق مەكتەپتەر مەن ۋنيۆەرسيتەتتەردەن ەۆاكۋاسيالانعان ساتتەردىڭ ۆيدەولارى پايدا بولدى، دەپ حابارلايدى infohub.kz سايتى.
جەلىدە الماتىلىقتاردىڭ جەر سىلكىنىسىنەن كەيىن پاتەرلەرىنەن كوشەگە شىعىپ جاتقان ۆيدەولارى تارادى. كەيبىرەۋلەرى 12-قاباتتان ءتۇستى. وقۋ ورىندارىندا دا ەۆاكۋاسيا جۇرگىزىلدى: ءبىر روليكتە وقۋشىلاردىڭ باسپالداقپەن جاپپاي تومەندەپ بارا جاتقانى كورىنەدى.
Threads الەۋمەتتىك جەلىسىندە الماتىلىقتار جەر سىلكىنىسى تۋرالى حابارلامالار جازىپ، ەۆاكۋاسيا قالاي وتكەنىن ايتتى. «الماتىدا جەر سىلكىنىسى بولدى. كىم سەزدى؟ ءبىز جۇمىستا ءوز بەتىمىزشە كوشەگە شىقتىق. كەيبىر پاتريوتتار كەڭسەدە قالىپ قويىپتى»، — دەپ جازدى ءبىر قىز.
«الماتى، بۇگىن بىزدە قاتتى جەر سىلكىنىسى بولدى، ءبىراق بالالار ادەتتەگىدەي كەرەك ساتتە ءبارىن جۇيەلى ءارى ناقتى جاسادى. بۇكىل مەكتەپتىڭ ەۆاكۋاسياسى تەز، ناقتى جانە ءقاۋىپسىز ءوتتى. بالالار وزدەرى تۇرىپ ويناپ جاتىر»، — دەپ اتاپ ءوتتى ءمۇعالىم الەۋمەتتىك جەلىدە.
«حابارلاما ادەتتەگىدەي كەش كەلدى... كورشىلەردىڭ ءبارى سىرتقا شىقتى، جاقىن ماڭداعى مەكتەپتىڭ بارلىق وقۋشىسىن دا الىپ شىقتى»، — دەدى تاعى ءبىر قولدانۋشى.
ۋنيۆەرسيتەتتەردە دە وقۋ پروسەسى توقتاتىلدى. بۇل تۋرالى ashilova1165 حابارلادى. «قاتتى ءدۇمپۋ سەزدىك. بالالار قاتتى قورىقتى. ءبىز ءتورتىنشى قاباتتامىز، ءبىزدى قاتتى شايقادى. دۇربەلەڭسىز بىردەن كوشەگە شىقتىق. قولىم ءالى دىرىلدەپ تۇر، كۇتپەگەن جەردەن بولدى»، — دەپ اڭگىمەلەدى وقىتۋشى.
osmanov.i.z دەگەن قولدانۋشى حابارلاما العان سوڭ بىردەن كوشەگە شىققانىن جازدى. «سيرەنانى جەر سىلكىنىسىنەن كەيىن عانا ەستىدىك. ەكى قاتتى ءدۇمپۋ بولدى. قالانىڭ ورتالىعىندامىز. شىعىس بولىگىن ونشا شايقاماعان دەيدى، كاماز ءوتىپ كەتكەندەي بولدى»، — دەپ ايتتى ەر ادام.
كەيبىرەۋلەر جەر سىلكىنىسىن پاتەردە وتىرىپ سەزدى. جەر استى ءدۇمپۋىنىڭ ءساتى بەينەباقىلاۋ كامەراسىنا ءتۇسىپ قالدى.
ەسكە سالايىق، بۇعان دەيىن ق ر تجم «سجعزوجي» ءجشس-نىڭ سەيسميكالىق ستانسيالار جەلىسى جەر سىلكىنىسىن تىركەگەن بولاتىن. سەيسميكالىق وقيعا الماتى قالاسىندا تىركەلگەنى حابارلاندى. كەيىنىرەك الماتىداعى سەزىلۋ دەڭگەيى 3-4 بالل بولعانى بەلگىلى بولدى. سونداي-اق دۇمپۋلەر قاسكەلەڭدە — 2-3 بالل؛ بورالداي 19 كم — 2-3 بالل؛ وتەگەن باتىر 28 كم — 2 بالل بولدى. كەيىن تج مينيسترلىگى الماتىداعى جەر سىلكىنىسى تۋرالى دەرەكتەردى جاريالادى — مەگاپوليستەگى جانە وبلىستاعى سەزىلۋ دەڭگەيى بەلگىلى بولدى.