قازاقستاندا تۇركىستان وبلىسىنىڭ جەتىساي قالاسىنداعى تويدا ايتقان تىلەگى قوعامدا كەڭ رەزونانس تۋدىرعان ەر ادام ۇستالدى. مەرەكەدەن تۇسىرىلگەن ۆيدەو الەۋمەتتىك جەلىگە تاراپ، قۇقىق قورعاۋ ورگاندارىنىڭ نازارىن اۋداردى، دەپ حابارلايدى infohub.kz.
«ق ر ءىىم جاڭالىقتارى» Telegram-ارناسىندا حابارلانعانداي، تۇركىستان وبلىسىنىڭ 66 جاستاعى تۇرعىنىنىڭ كوپشىلىك الدىندا ايتقان سوزدەرى جازىلعان بەينەجازبانىڭ تاراتىلۋىنا بايلانىستى ءدىني جانە الەۋمەتتىك الاۋىزدىقتى قوزدىرۋ بەلگىلەرى بويىنشا قىلمىستىق ءىس قوزعالدى. كۇدىكتى ۇستالىپ، ۋاقىتشا ۇستاۋ يزولياتورىنا قامالدى.
ۆەدومستۆو قازاقستان رەسپۋبليكاسىنىڭ كونستيتۋسياسى مەملەكەتتىڭ زايىرلى، قۇقىقتىق جانە الەۋمەتتىك سيپاتىن بەكىتەتىنىن، وندا ادام، ونىڭ قۇقىقتارى مەن بوستاندىقتارى ەڭ جوعارى قۇندىلىق بولىپ تابىلاتىنىن (1-باپ) ەسكە سالدى. بارلىعى زاڭ الدىندا تەڭ، ال كەز كەلگەن كەمسىتۋشىلىك، ونىڭ ىشىندە جىنىسى مەن دىنگە قاتىناسى بويىنشا دا تىيىم سالىنادى (16-باپ). سونىمەن قاتار ءسوز بوستاندىعى باسقا ادامداردىڭ ار-نامىسى مەن قادىر-قاسيەتىنە قول سۇعۋعا ءتيىس ەمەس، ال ءدىني جانە الەۋمەتتىك الاۋىزدىقتى ناسيحاتتاۋعا جول بەرىلمەيدى (23-باپ).
ءىىم كەز كەلگەن كوپشىلىك الدىندا ايتىلعان، ادامنىڭ قادىر-قاسيەتىن كەمسىتەتىن، ايەلدەردى قورلايتىن، ءدىني نەمەسە الەۋمەتتىك الاۋىزدىقتى قوزدىراتىن نە قوعامدىق كەلىسىمدى بۇزۋعا باعىتتالعان سوزدەر زاڭعا سايكەس قۇقىقتىق باعالاناتىنىن ەسكەرتتى.
ەسكە سالايىق، بەينەنى ءانشى روزا القوجا Instagram-داعى پاراقشاسىندا جاريالاعان. ول مەرەكە جەتىسايدا وتكەنىن، ال تىلەكتى قالىڭدىقتىڭ تۋىسى ايتقانىن اتاپ ءوتتى. ەر ادام تويلاردا الكوگولدەن باس تارتقاننان كەيىن تاعى ەكى قادام جاساۋ كەرەكتىگىن ايتقان: «بىرىنشىدەن، مۋزىكادان ارىلۋ كەرەك. ەكىنشىدەن، ەرلەر مەن ايەلدەر بولەك وتىرۋى ءتيىس. انشىلەر مەنى كەشىرسىن. ەگەر تويلاردى انشىلەرسىز وتكىزسە، ولار جۇلدىز بولۋدان قالادى جانە تانىمالدىلىعىن جوعالتادى. شاريعاتتا ولاردى "شايتاننىڭ جارشىسى" دەپ اتايدى».
ءانشىنىڭ پىكىرىنشە، مۇنداي سوزدەر ەر ادامنىڭ دەسترۋكتيۆتى ءدىني اعىمداردىڭ بىرىنە جاقىندىعىن كورسەتۋى مۇمكىن. مەرەكە قوناعىنىڭ سوزىنە ق ر پرەزيدەنتى اكىمشىلىگى باسشىسىنىڭ ءبىرىنشى ورىنباسارى ەرلان قارين جانە قمدب وكىلدەرى جاۋاپ بەردى.