جەتىسۋ وبلىسىنىڭ اقسۋ اۋدانىندا ايەلدەر اراسىندا جانجال بولىپ، ونىڭ ءبىرى ەكىنشىسىن پوليسيا قىزمەتكەرىنىڭ كوزىنشە بەتىنەن تەپكەن. وقيعا بەينەكامەراعا ءتۇسىپ، «كريمينالنىي كازاحستان» Telegram-ارناسىندا جاريالانعان، دەپ حابارلايدى infohub.kz.
باسىلىمداعى مالىمەتكە سايكەس، ساتۋشىلار اراسىنداعى جانجال توبەلەسكە ۇلاسقان. كادرلاردا ءبىر ايەل جەردە جاتقان قارسىلاسىنا جاقىنداپ، ونى بەتىنەن تەپكەنى كورىنەدى، ال قاسىندا پوليسيا قىزمەتكەرى تۇر. زارداپ شەككەن ايەل اۋرۋحاناعا جەتكىزىلگەنى ايتىلادى.
جەتىسۋ وبلىسى پوليسيا دەپارتامەنتىنىڭ ءباسپاسوز قىزمەتى NUR.KZ تىلشىسىنە ۇرىپ-سوعۋ فاكتىسى بويىنشا قىلمىستىق ءىس قوزعالعانىن حابارلادى. وقيعاعا قاتىسۋشىلاردىڭ بارلىعى انىقتالىپ، اۋداندىق پوليسيا بولىمىنە جەتكىزىلگەن. الدىن الا مالىمەت بويىنشا، كۇدىكتى مەن جابىرلەنۋشى بۇرىن تانىس بولعان.
قازىرگى ۋاقىتتا وقيعانىڭ بارلىق ءمان-جايىن انىقتاۋ جانە جانجالعا قاتىسۋشىلاردىڭ ارەكەتتەرىنە قۇقىقتىق باعا بەرۋ ءۇشىن قاجەتتى تەرگەۋ امالدارى جۇرگىزىلۋدە.
«تەرگەۋ ناتيجەلەرى بويىنشا قازاقستان رەسپۋبليكاسىنىڭ قولدانىستاعى زاڭناماسىنا سايكەس پروسەسسۋالدىق شەشىم قابىلدانادى. قازاقستان رەسپۋبليكاسى قىلمىستىق-پروسەستىك كودەكسىنىڭ 201-بابىنا سايكەس وزگە اقپارات تەرگەۋ مۇددەسىنە وراي جاريا ەتىلمەيدى»، — دەپ مالىمدەدى ۆەدومستۆودان.