جەتىسۋ وبلىسىندا تەكەلي قالاسىنىڭ جاڭا اكىمى تاعايىندالدى. ول — بۇعان دەيىن ەنەرگەتيكا جانە تۇرعىن ۇي-كوممۋنالدىق شارۋاشىلىق باسقارماسىن باسقارعان 44 جاستاعى ايدوس بەكەتايەۆ، دەپ حابارلايدى infohub.kz سايتى.
وبلىس اكىمدىگىنىڭ رەسمي سايتىندا حابارلانعانداي، پرەزيدەنت اكىمشىلىگىمەن جانە قالالىق ءماسليحات دەپۋتاتتارىمەن كەلىسىلگەن سوڭ، تەكەلي قالاسىنىڭ اكىمى بولىپ 44 جاستاعى ايدوس بەكەتايەۆ تاعايىندالدى. جاڭا باسشىنى قالا اكتيۆىنە وبلىس اكىمى بەيبىت يسابايەۆ تانىستىردى.
وبلىس باسشىسى تەكەلي قالاسىنىڭ اكىمى قىزمەتىن ءتورت جىل اتقارىپ، باسقا جۇمىسقا اۋىسۋىنا بايلانىستى قىزمەتتەن بوساتىلعان الماس ادىلگە قالانىڭ الەۋمەتتىك-ەكونوميكالىق دامۋىنا قوسقان ۇلەسى ءۇشىن العىس ءبىلدىردى.
ايدوس بەكەتايەۆ 1982 جىلى دۇنيەگە كەلگەن. جوعارى ءبىلىمدى. ول «تۇران» ۋنيۆەرسيتەتىن، جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىن، سەرىكبايەۆ اتىنداعى شىعىس قازاقستان تەحنيكالىق ۋنيۆەرسيتەتىن «قارجى»، «مەملەكەتتىك جانە جەرگىلىكتى باسقارۋ» ماماندىقتارى بويىنشا بىتىرگەن، تەحنيكا جانە تەحنولوگيا ماگيسترى.
ەڭبەك جولىن الماتىداعى «ەرساك» ءجشس-نىڭ مەنەدجەرى رەتىندە باستاعان. مەملەكەتتىك قىزمەتتە 2010 جىلدان بەرى جۇمىس ىستەيدى. ءار جىلدارى كورىكتەندىرۋ ءبولىمىنىڭ باس مامانى، اكىم اپپاراتىنىڭ كوممۋنالدىق شارۋاشىلىق ءبولىمىنىڭ باسشىسى، الماتى قالاسى تۇركسىب اۋدانى اكىمىنىڭ ورىنباسارى قىزمەتتەرىن اتقارعان.
2023 جىلدىڭ قازان ايىنان وسى تاعايىنداۋعا دەيىن جەتىسۋ وبلىسىنىڭ ەنەرگەتيكا جانە تۇرعىن ۇي-كوممۋنالدىق شارۋاشىلىق باسقارماسىنىڭ باسشىسى بولدى.