جەتىسۋ وبلىسىنىڭ تۇرعىنى تويدىڭ بولماي قالۋىنا بايلانىستى مەيرامحانانىڭ ۇلكەن سومانى قايتارۋدان باس تارتۋىنا تاپ بولدى، الايدا مامانداردىڭ ارالاسۋىنىڭ ارقاسىندا ادىلدىك ورنادى، دەپ حابارلايدى infohub.kz سايتى.
ق ر ساۋدا جانە ينتەگراسيا مينيسترلىگىنىڭ تۇتىنۋشىلار قۇقىعىن قورعاۋ كوميتەتىنىڭ مالىمەتىنشە، ايەل وتباسىلىق مەرەكەگە مەيرامحانانى الدىن الا برونداپ، 1 ميلليون تەڭگە كولەمىندە الدىن الا تولەم جاساعان. الايدا وتباسىلىق جاعدايلارعا بايلانىستى ءىس-شارانى وتكىزۋ مۇمكىن بولماي، ول كاسىپكەرگە بەلگىلەنگەن كۇننەن شامامەن ەكى اي بۇرىن حابارلاعان.
مۇنداي مەرزىمىندە حابارلاعانىنا قاراماستان، مەيرامحانا يەسى اقشانى قايتارۋدان باس تارتىپ، تولەنگەن سومانى كەپىلدىك تولەم دەپ سانايتىنىن ايتقان. سونىمەن قاتار، تۇتىنۋشىنىڭ ايتۋىنشا، تاراپتار اراسىندا جازباشا كەلىسىم جاسالماعان، ال ءىس-شارا بولماي قالعان جاعدايدا اقشا قايتارىلمايتىنى تۋرالى شارت الدىن الا كەلىسىلمەگەن.
جانجالدى ءوز بەتىنشە شەشە الماعان ايەل جەتىسۋ وبلىسى بويىنشا ساۋدا جانە تۇتىنۋشىلار قۇقىعىن قورعاۋ دەپارتامەنتىنە جۇگىنگەن. ۆەدومستۆو ماماندارى ءىستىڭ ءمان-جايىن زەرتتەپ، تۇتىنۋشىنىڭ قۇقىعىن قورعاۋعا كومەكتەسكەن. كاسىپكەرگە اقشانى قايتارۋ تالابىمەن جانە ماسەلەنى سوتقا دەيىن شەشۋدى ۇسىنىپ، شاعىم جولدانعان.
ناتيجەسىندە مەيرامحانا يەسى ايەلگە بارلىق سومانى — 1 ميلليون تەڭگەنى ءوز ەركىمەن قايتارعان.