جەزقازعان اكىمى قايرات شايجانوۆ مەملەكەتتىك قىزمەتتەن كەتەتىنىن جاريالادى. بۇرىنعى قالا باسشىسى بۇگىن قالا تۇرعىندارىنا ارناپ ۇندەۋ جاريالاپ، اتقارعان جۇمىسىنىڭ قورىتىندىسىن شىعاردى، دەپ حابارلايدى infohub.kz سايتى.
ەكس-اكىمنىڭ ايتۋىنشا، قالا باسشىلىعىنداعى جۇمىس كەزەڭى زور جاۋاپكەرشىلىكپەن قاتار ءجۇرىپ، ول ءۇشىن باسقارۋشىلىق مەكتەپ بولعان.
«وسى ۋاقىت ىشىندە ءبىز بىرگە كوپتەگەن ماسەلەنى كوتەردىك، بىرگە كوپتەگەن باستامانى جۇزەگە اسىردىق. سىزدەر قولداعان جەردە مەن كۇشەيدىم، سىن تاستاعان جەردە ودان ءارى شىڭدالدىم»، — دەدى قايرات شايجانوۆ ءوز مالىمدەمەسىندە.
ول سونداي-اق قالا تۇرعىندارىنا سەنىم بىلدىرگەنى ءۇشىن العىس ايتىپ، جەزقازعان ول ءۇشىن جاي جۇمىس ورنى ەمەس، تاعدىرى مەن ەڭبەك جولىمەن تىعىز بايلانىسقان تۋعان قالا ەكەنىن اتاپ ءوتتى.
قايرات شايجانوۆ 1977 جىلى 22 شىلدەدە دۇنيەگە كەلگەن. ەكى باعىت بويىنشا جوعارى ءبىلىمى بار: «ونەركاسىپتىك جانە ازاماتتىق قۇرىلىس» جانە «قۇقىقتانۋ». ەڭبەك جولىن جەكە سەكتوردا باستاپ، قۇرىلىس كومپانيالارىندا باسشىلىق قىزمەتتەر اتقارعان. مەملەكەتتىك جانە كۆازيمەملەكەتتىك باسقارۋ جۇيەسىندە مول تاجىريبەسى بار. 2007 جىلى ساتبايەۆ قالاسىنداعى جەزقازعان كەنتىنىڭ اكىمى بولىپ، كەيىن ساتبايەۆ اكىمىنىڭ ورىنباسارى قىزمەتىن اتقاردى.
2013 جىلى استاناداعى «تۇرعىن ۇي-كوممۋنالدىق شارۋاشىلىقتى جاڭعىرتۋ جانە دامىتۋ قازاقستاندىق ورتالىعى» اق-نىڭ كوممۋنالدىق شارۋاشىلىق دەپارتامەنتىنىڭ باسشىسى بولدى. كەيىن سالالىق عىلىمي-تەحنيكالىق ورتالىقتىڭ باس ديرەكتورى اتاندى. 2015 جىلعى قاراشادان 2017 جىلعى ماۋسىمعا دەيىن قاراعاندى وبلىسى وساكاروۆ اۋدانىنىڭ اكىمى قىزمەتىندە بولدى. 2015 جىلى «الەم-ستروي» ءجشس-ىن دە از ۋاقىت باسقاردى.
قايرات شايجانوۆ جەزقازعان قالاسىنىڭ اكىمى قىزمەتىن 2022 جىلعى ماۋسىمنان باستاپ اتقارىپ، بۇل قىزمەتتە ءتورت جىل ەڭبەك ەتتى.