جەزقازعان- قىزىلوردا اۆتوموبيل جولىن جاڭعىرتىپ، ونىڭ بۇكىل بويىمەن قوزعالىستى اشۋ جاقىن ايلاردا اياقتالادى. بۇل تۋرالى ۇلىتاۋ وبلىسىنىڭ اكىمى ەسەت بايكەن مالىمدەدى، دەپ حابارلايدى infohub.kz سايتى.
«جەزقازعان- قىزىلوردا» اۆتوجولىنداعى جۇمىستار 90 پايىزعا ورىندالدى. جاقىن ايلاردا قوزعالىس اشىلادى دەپ جوسپارلانىپ وتىر. «جەزقازعان – قاراعاندى» باعىتىندا بيىل توپىراق توسەۋ جانە ماتەريالدىق-تەحنيكالىق قامتاماسىز ەتۋ جۇمىستارى تولىق اياقتالادى. سونىمەن قاتار « ۇلىتاۋ-ارقالىق» جولىنىڭ 89 شاقىرىمدىق بولىگىندەگى جوندەۋ قازان ايىندا بىتەدى»، – دەپ كەلتىرەدى اكىمنىڭ ءسوزىن ونىڭ ءباسپاسوز قىزمەتى.
ەسەت بايكەن وبلىس ورتالىعى – جەزقازعان قالاسىنداعى ۆوكزالدىڭ اشىلۋ سالتاناتىندا ءسوز سويلەدى. بۇدان بولەك، قىزىلجار، قاراجال جانە جاڭاارقا ستانسيالارىنداعى ۆوكزالداردى جاڭعىرتۋ اياقتالدى. قازىرگى تاڭدا ۇلىتاۋ وبلىسى قازاقستاننىڭ التى وبلىسىمەن تەمىرجول قاتىناسىمەن بايلانىسقان. جاڭعىرتىلعان ۆوكزالدار ءوڭىر تۇرعىندارى مەن وبلىس قوناقتارىنا قولايلى ءارى ءقاۋىپسىز جاعداي جاساۋعا مۇمكىندىك بەرەدى.
اكىم ۆوكزالداردى جاڭعىرتۋ ءوڭىردىڭ كولىك ينفراقۇرىلىمىن دامىتۋداعى ماڭىزدى قادام ەكەنىن اتاپ ءوتتى. قازىرگى تاڭدا ەلدىڭ ترانزيتتىك الەۋەتىن ارتتىراتىن قىزىلجار-مويىنتى تەمىرجول جەلىسىنىڭ قۇرىلىسى دا ءجۇرىپ جاتىر.
بۇعان دەيىن قازاقستاندىقتار الەۋمەتتىك جەلىلەردە ەكى وبلىس ورتالىعىن ەڭ قىسقا جولمەن جالعايتىن جەزقازعان- قىزىلوردا اۆتوجولىنىڭ ناشار جاعدايىنا بىرنەشە رەت شاعىمدانعان. بۇل جول قىزىلوردادان استاناعا، ودان ءارى ەلدىڭ سولتۇستىگىنە نەمەسە رەسەي فەدەراسياسىنا قىسقا جولمەن جەتۋگە مۇمكىندىك بەرەدى. الايدا جول توسەمىنىڭ ساپاسىزدىعىنان، ال جاڭعىرتۋ باستالعان سوڭ جەكەلەگەن ۋچاسكەلەردەگى اينالما جولدارعا بايلانىستى جۇرگىزۋشىلەر ەلدىڭ وڭتۇستىگى ارقىلى ۇزاعىراق جولدى (وڭتۇستىك، بالقاش جانە قاراعاندى ارقىلى شامامەن 2 مىڭ كم) تاڭدايدى.
جەزقازعان- قىزىلوردا اۆتوجولىنىڭ ۇزىندىعى 424 كم، ونىڭ 216 شاقىرىمى قىزىلوردا وبلىسىنا تيەسىلى. 2025 جىلدىڭ قاراشاسىندا قىزىلوردا وبلىسىنىڭ اكىمى نۇرلىبەك نالىبايەۆ (ءقازىر ق ر ءبىرىنشى ۆيسە-پرەمەرى) قىزىلوردا وبلىسىنداعى 216 شاقىرىمدىق ۋچاسكەنىڭ رەكونسترۋكسياسى اياقتالعانىن حابارلاعان. ۇلىتاۋ وبلىسىنداعى ۋچاسكە ءالى جۇمىس ۇستىندە. جەزقازعان- قىزىلوردا اۆتوجولىن جاڭعىرتۋ جۇمىستارى 2022 جىلى باستالعان.