26 جاستاعى قازاقستاندىق تەننيسشى جيبەك كۋلامباەۆا ارمەنيا اتىنان ونەر كورسەتەتىن الينا چاراەۆامەن بىرگە رۋمىنيانىڭ ياسسى قالاسىندا ءوتىپ جاتقان WTA-250 ساناتىنداعى ءتۋرنيردىڭ جۇپتىق سىنىندا تۇڭعىش رەت جارتىلاي فينالعا شىقتى. بۇل تۋرالى infohub.kz حابارلايدى.
شيرەك فينالدا قازاقستاندىق-ارمياندىق دۋەت يسپاندىق گەورگينا گارسيا پەرەس پەن رەسەيلىك الەۆتينا يبراگيموۆانى 6:2، 7:5 ەسەبىمەن جەڭدى. ءبىرىنشى سەتتە جيبەك پەن الينا ەكى برەيك جاساپ، 3:0 ەسەبىمەن العا شىعىپ، سەنىمدى جەڭىسكە جەتتى. ەكىنشى سەت تارتىستى ءوتتى: قارسىلاستار ەكى رەت ەسەپتى تەڭەستىردى، ءبىراق شەشۋشى برەيكتى كۋلامباەۆا مەن چاراەۆا 11ء-شى گەيمدە جاسادى. ماچ 1 ساعات 16 مينۋتقا سوزىلدى، بىردە-بىر ەيس بەرىلمەدى، ال ۇتىس ۇپايلارى 61:46 بولىپ، جەڭىمپازداردىڭ پايداسىنا شەشىلدى.
جارتىلاي فينالدا كۋلامباەۆا مەن چاراەۆا ءتۋرنيردىڭ ءبىرىنشى راكەتكالارى — بەلگيالىق ماگالي كەمپەن جانە رەسەيلىك الەكساندرا پانوۆامەن كەزدەسەدى. ەكى تەننيسشى ءۇشىن دە WTA-250 جارتىلاي فينالىنا شىعۋ تاريحي جەتىستىك بولدى.
جەكە سىندا بۇرىنعى رەسەيلىك، ءقازىر ارمەنيا اتىنان ونەر كورسەتىپ، يسپانيادا جاتتىعاتىن چاراەۆا قازاقستاندىق يۋليا پۋتينسەۆادان 3:6، 3:6 ەسەبىمەن ۇتىلدى. ال كۋلامباەۆا جەكە سىننىڭ ىرىكتەۋىندە يسپاندىق لەيرا رومەرو گورمەزگە 1:6، 4:6 ەسەبىمەن ەسە جىبەردى.
Unicredit Iasi Open ءتۋرنيرى 2022 جىلدان بەرى توپىراق كورتتارىندا وتكىزىلەدى. 2025 جىلى ول WTA كۇنتىزبەسىندەگى ۆەنگريا گران-پريىنىڭ ورنىنا ەنىپ، 250 ساناتىنا يە بولدى. جەكە سىندا جەرگىلىكتى تەننيسشىلەر ءۇش رەت جەڭىسكە جەتكەن، 2024 جىلى رەسەيلىك ميررا اندرەەۆا چەمپيون اتانعان. 2024 جىلى جۇپتىق سىندا قازاقستاندىق اننا دانيلينا مەن رەسەيلىك يرينا حروماچەۆا توپ جاردى.
Unicredit Iasi Open-2026 جۇلدە قورى 283 350 دوللاردى قۇرايدى. ءبىرىنشى راكەتكا رۋمىندىق جاكلين كريستيان سوڭعى ساتتە جارىستان باس تارتتى، ونىڭ ورنىن يۋليا پۋتينسەۆا باستى.