قوستاناي وبلىسىندا ءجىتىقارا تۇرعىنىنا قاتىستى ۇكىم شىقتى. ول وگەي بالاسىن ءولتىرىپ، ايەلىنە قاستاندىق جاساعانى ءۇشىن كىنالى دەپ تانىلدى. قايعىلى وقيعا 2026 جىلدىڭ ساۋىرىندە بولعان. ماس كۇيىندەگى ەر ادام ايەلىنە ىشىنەن پىشاق سالعان، كەيىن اناسىن قورعاماق بولعان ءجاسوسپىرىمدى قازاعا ۇشىراتقان، دەپ حابارلايدى infohub.kz سايتى.
قوستاناي وبلىسى سوتتارىنىڭ رەسمي Telegram-ارناسى تاراتقان مالىمەتكە سايكەس، قىلمىستىق ىستەر جونىندەگى مامانداندىرىلعان اۋدانارالىق سوت ءجىتىقارا تۇرعىنىنا قاتىستى ءىستى قارادى. وعان ادام ءولتىرۋ جانە ادام ولتىرۋگە وقتالۋ (ق ر قك-نىڭ 24-بابى 3-بولىگى، 99-بابى 1-بولىگى، 99-بابى 2-بولىگىنىڭ 10، 13، 14-تارماقتارى) باپتارى بويىنشا ايىپ تاعىلدى.
سوت تەرگەۋى بارىسىندا 2026 جىلدىڭ ساۋىرىندە ايىپتالۋشى ماس كۇيىندە جانجال كەزىندە ايەلىنە ءىش قۋىسىنان پىشاق سالىپ، دەنساۋلىعىنا اۋىر زيان كەلتىرگەنى انىقتالدى. الايدا ول نيەتىن سوڭىنا دەيىن جەتكىزە المادى: ايەلدىڭ ايقايىنا ونىڭ كامەلەتكە تولماعان ۇلى جۇگىرىپ كەلىپ، وگەي اكەسىن توقتاتپاق بولدى. ءجاسوسپىرىم قىلمىسكەردىڭ قولىنان پىشاقتى تارتىپ الۋعا تىرىسقاندا، ول وعان كەۋدە تۇسىنان ءتورت رەت سوققى جاساپ، ءجاسوسپىرىم سول جەردە قايتىس بولدى. وسىدان كەيىن ەر ادام ايەلىنە تاعى دا پىشاقپەن سوققى جاساماق بولعان، ءبىراق وقيعاعا ارالاسقان جابىرلەنۋشىنىڭ اعاسى ونى قارۋسىزداندىرعان.
مەملەكەتتىك ايىپتاۋشى ايىپتالۋشىعا ورتاشا قاۋىپسىزدىكتەگى قىلمىستىق-اتقارۋ جۇيەسى مەكەمەسىندە جازاسىن وتەۋمەن 22 جىل باس بوستاندىعىنان ايىرۋدى سۇرادى. جابىرلەنۋشىلەر ءومىر بويى باس بوستاندىعىنان ايىرۋدى تالاپ ەتتى.
سوتتا ايىپتالۋشى كىناسىن تولىق مويىنداپ، جابىرلەنۋشىلەردەن كەشىرىم سۇرادى. سوت اۋىرلاتاتىن ءمان-جاي رەتىندە قىلمىستىڭ ماس كۇيىندە جاسالعانىن ەسكەردى، ال جەڭىلدەتەتىن ءمان-جايلار رەتىندە كىنانى مويىنداۋ مەن شىن جۇرەكتەن وكىنۋىن تانىدى.
ق ر قك-نىڭ 56-بابىنىڭ تالاپتارىن ەسكەرە وتىرىپ، وعان سايكەس قىلمىسقا وقتالۋ ءۇشىن جازا اياقتالعان قىلمىس ءۇشىن ەڭ جوعارى مەرزىمنىڭ تورتتەن ءۇش بولىگىنەن اسپاۋى ءتيىس، سونداي-اق جازالاردى ءىشىنارا قوسۋ ءپرينسيپىن قولدانا وتىرىپ، سوت كىنالىگە ورتاشا قاۋىپسىزدىك مەكەمەسىندە 23 جىل باس بوستاندىعىنان ايىرۋ جازاسىن تاعايىندادى. جابىرلەنۋشىلەردىڭ مورالدىق زياندى وتەۋ تۋرالى ازاماتتىق تالابى ءىشىنارا قاناعاتتاندىرىلدى.
ۇكىم زاڭدى كۇشىنە ەنگەن جوق. ەسكە سالايىق، 25 ساۋىردە ءجىتىقارانىڭ 37 جاستاعى تۇرعىنى پىشاق جاراقاتىن العان، ال ونىڭ 15 جاسار ۇلى سول جەردە قايتىس بولعان بولاتىن. كۇدىكتى — ايەلدىڭ كۇيەۋى — پوليسيامەن ىستىق ىزبەن ۇستالعان ەدى.