قازاقستانداعى رەسپۋبليكالىق اۆتوجولدا تۇنگى ۋاقىتتا جۇك كولىگى جولدىڭ بەلگىلەنبەگەن جەرىنەن شىققان ءىرى قارا مال تابىنىمەن سوقتىعىستى. وقيعانى جاساندى ينتەللەكت كامەرالارى تىركەپ، ءقاۋىپتى جاعدايدى دەر كەزىندە انىقتاپ، اقپاراتتى وپەراتورلارعا جەتكىزدى، ال وقيعا ورنىنا جول قىزمەتتەرى جىبەرىلدى، دەپ حابارلايدى infohub.kz سايتى.
«قازاۆتوجول» مالىمدەگەندەي، رەسپۋبليكالىق جولدار بويىنداعى ءقاۋىپتى ۋچاسكەلەردە مالدىڭ جولعا شىعۋىنا كەدەرگى بولاتىن قورعانىش تورلى قورشاۋلار ورناتىلىپ جاتىر. الايدا ماسەلە شەشىلمەي وتىر: كەيبىر يەلەر مالدى قاراۋسىز قالدىرادى، سونداي-اق جول قورشاۋلارىنىڭ ەلەمەنتتەرىن ءبۇلدىرۋ جانە ۇرلاۋ دەرەكتەرى تىركەلۋدە.
كومپانيا اۋىل شارۋاشىلىعى مالدارىنىڭ يەلەرىنە مالدى قاراۋسىز قالدىرماۋعا جانە ونىڭ اۆتوموبيل جولدارىنا شىعۋىنا جول بەرمەۋگە شاقىردى. «تۇندە جۇرگىزۋشى مالدى سوقتىعىسقانعا دەيىن بىرنەشە سەكۋند قانا كورەدى. ادامداردىڭ ءومىرى قاۋىپتە قالادى»، — دەلىنگەن حابارلامادا.
«قازاۆتوجول» جەكە-دارا ازاماتتارعا دا ۇندەۋ تاستاپ، جول قورشاۋىن ۇرلاۋ نەمەسە ءبۇلدىرۋ — بۇل جاي عانا م ۇلىككە كەلتىرىلگەن زيان ەمەس ەكەنىن اتاپ ءوتتى. اشىق قالعان ۋچاسكە مالدىڭ تراسساعا شىعاتىن ورنىنا اينالىپ، اۋىر جكو-عا سەبەپ بولۋى مۇمكىن.
جۇرگىزۋشىلەردەن «مال ايداۋ» جانە «جابايى جانۋارلار» جول بەلگىلەرى قويىلعان ۋچاسكەلەردە، اسىرەسە تۇنگى ۋاقىتتا جانە كورىنۋ شەكتەۋلى كەزدە جىلدامدىقتى ازايتىپ، ەرەكشە ساق بولۋدى سۇرادى.
«مال قاراۋدا بولۋى كەرەك. قورشاۋ ءوز ورنىندا تۇرۋى ءتيىس. ال جۇرگىزۋشى قاۋىپكە دايىن بولۋى شارت. جولدا ابايسىزدىقتىڭ باعاسى ادام ءومىرى بولۋى مۇمكىن»، — دەپ قوستى «قازاۆتوجول».