Instagram-داعى چاتتان الىنعان سكرينشوت نەمەسە ستوريس سوت ىسىنە سەبەپ بولۋى مۇمكىن — بۇل تۋرالى قازاقستان رەسپۋبليكاسىنىڭ جوعارعى سوتى ەسكەرتتى. سوتتار قۇقىقبۇزۋشىلاردى قورلايتىن جازبالاردى وشىرۋگە، جالعان مالىمەتتەردى تەرىسكە شىعارۋعا جانە رۇقساتسىز پايدالانىلعان فوتوسۋرەتتەر ءۇشىن مورالدىق زياننىڭ ورنىن تولتىرۋعا مىندەتتەپ وتىر، دەپ حابارلايدى infohub.kz سايتى.
وسكەمەندە تۇرعىن ايەل الەۋمەتتىك جەلىدەن وزىنە قورلايتىن مازمۇندى بايقاعان. ەكى قولدانۋشى ونىڭ سۋرەتىن بىلاپىت سوزدەرمەن بىرگە جاريالاعان. جازبا اۆتورلارى ايەلدىڭ ادەپسىز قىلىعىن اشىق مەڭزەپ، «كليەنتتەرمەن جۇرگىزگەن ارام پيعىلدى ايلا-شارعىلارى» تۋرالى دا جازعان.
سوت تالقىلاۋى بارىسىندا جاۋاپكەرلەر ءوز ارەكەتتەرىن اقتاۋعا تىرىسىپ، ءماتىن تەك ولاردىڭ «جەكە پىكىرى» دەپ مالىمدەگەن. سوت بۇل ۋاجدەردى قابىلدامادى. ناقتى ادامعا قاتىستى ايتىلعان ەموسيالىق ايىپتاۋلار — دەرەكتەرمەن دالەلدەۋدى تالاپ ەتەتىن تۇجىرىمدار دەپ تانىلدى.
سوت بۇزۋشىلاردى جازبالاردى ءوشىرىپ، تەرىسكە شىعارۋ ءماتىنىن جاريالاۋعا مىندەتتەدى. ەكى جاۋاپكەردىڭ ءارقايسىسىنان مورالدىق زياننىڭ ورنىن تولتىرۋ رەتىندە 300 مىڭ تەڭگەدەن، سونداي-اق سوت شىعىندارى ءوندىرىلدى. جوعارى تۇرعان ينستانسيالار بۇل شەشىمدى كۇشىندە قالدىردى.
ۇقساس ءىس جامبىل وبلىسىنىڭ شۋ اۋداندىق سوتىندا ونلاين فورماتتا قارالدى. استانا تۇرعىنى ءوز سۋرەتىن اۋديتورياسى شامامەن 1،5 مىڭ ادامنان تۇراتىن ەكى WhatsApp چاتىنان تاپقان.
سوت ۇسىنىلعان حات الماسۋ سكرينشوتتارىن تولىققاندى ەلەكتروندىق دالەلدەمە دەپ تانىدى، ال سۋرەتتىڭ كەلىسىمسىز جاريالانۋىن قۇقىق بۇزۋشىلىق دەپ باعالادى. تالاپكەردىڭ پايداسىنا ەكى كورشىسىنەن 20 مىڭ تەڭگەدەن ءوندىرىلدى. سونىمەن قاتار سوت حابارلامالاردى ءوشىرۋ تۋرالى تالاپتى قاناعاتتاندىرۋدان باس تارتتى، سەبەبى ۋاقىت وتە كەلە ولاردى تاراتۋعا قاتىسقانداردىڭ بارلىعىنان ءوشىرۋدى تەحنيكالىق تۇرعىدان قامتاماسىز ەتۋ مۇمكىن ەمەس. ءۇشىنشى جاۋاپكەرگە قاتىستى تالاپ ونىڭ قاتىسى بار ەكەنى دالەلدەنبەگەندىكتەن قابىلدانبادى. جامبىل وبلىستىق سوتى وسى شەشىمدى قولدادى.
«وسىلايشا، الەۋمەتتىك جەلىدەگى جەكە پىكىر، ەگەر ول ادامعا قاتىستى دەرەكتەرمەن دالەلدەنبەگەن ناقتى ايىپتاۋلاردى قامتىسا، جاۋاپكەرشىلىكتەن بوساتپايدى»، — دەپ اتاپ وتىلگەن جوعارعى سوت ماتەريالدارىندا.
ق ر ازاماتتىق كودەكسىنىڭ 145-بابىنا سايكەس، ەشكىم دە قانداي دا ءبىر ادامنىڭ بەينەسىن ونىڭ تىكەلەي كەلىسىمىنسىز پايدالانۋعا قۇقىلى ەمەس. بۇل نورما الەۋمەتتىك جەلىلەردەگى كەز كەلگەن جاريالانىمدارعا، ستوريستەرگە جانە توپتىق چاتتارداعى جاپپاي تاراتۋلارعا قاتىستى. ەگەر مۇنداي مالىمەتتى تاراتقان ادام ولاردىڭ شىندىققا سايكەس ەكەنىن دالەلدەي الماسا، ازاماتتار ءوزىنىڭ ار-نامىسىن، قادىر-قاسيەتىن نەمەسە ىسكەرلىك بەدەلىن كەمسىتەتىن مالىمەتتەردى سوت ارقىلى تەرىسكە شىعارۋدى تالاپ ەتۋگە زاڭدى قۇقىلى.