قازاقستاندا ەڭ جوعارى جالاقى ۇسىناتىن بوس ورىندار IT سالاسىندا شوعىرلانعان، مۇندا ماماندار ايىنا ەكى ميلليون تەڭگەگە دەيىن تابىس تابا الادى. بۇل تۋرالى infohub.kz سايتى حابارلايدى.
ەڭبەك جانە حالىقتى الەۋمەتتىك قورعاۋ مينيسترلىگىنىڭ دەرەگىنشە، جۇمىس بەرۋشىلەر كوبىنەسە ءبىلىم بەرۋ، دەنساۋلىق ساقتاۋ جانە قۇرىلىس سالالارىنا قىزمەتكەرلەر ىزدەيدى. سونداي-اق ءوندىرىس، كولىك جانە لوگيستيكا سالالارىندا دا سۇرانىس جوعارى. ال تابىس دەڭگەيى كاسىپكە، بىلىكتىلىككە جانە جۇمىس تاجىريبەسىنە تىكەلەي بايلانىستى.
ەلەكتروندىق ەڭبەك بيرجاسىندا جالاقىسى 300 مىڭ تەڭگەدەن اساتىن 11 مىڭنان استام بوس ورىن تىركەلگەن. بىلىكتى ماماندار ءۇشىن ودان دا تارتىمدى جاعدايلار قاراستىرىلعان: IT سالاسىندا – 2 ميلليون تەڭگەگە دەيىن، وندىرىستە – 1،7 ميلليونعا دەيىن، قۇرىلىستا – 1،2 ميلليونعا دەيىن، اۋىل شارۋاشىلىعى مەن دەنساۋلىق ساقتاۋدا – 1 ميلليونعا دەيىن، ءبىلىم بەرۋدە – 750 مىڭ تەڭگەگە دەيىن.
جۇمىس ىزدەۋشىلەر اراسىندا ەڭ جوعارى جالاقى ءۇمىتى ۇشقىش (2،39 ملن تەڭگە)، ستيۋاردەسسا (1،43 ملن تەڭگە) جانە ەلەكتر ستانسياسىنىڭ باستىعى (شامامەن 1،32 ملن تەڭگە) لاۋازىمدارىنا ۇمىتكەرلەردە تىركەلگەن.
بۇعان دەيىن قازاقستاندىقتار ءوزىن كەدەي سەزىنبەۋى ءۇشىن ايىنا 320 مىڭ تەڭگە قاجەت ەكەنى حابارلانعان بولاتىن.