قىرعىزستاننىڭ جوگوركۋ كەنەش ءتوراعاسى مارلەن ماماتالييەۆ شەتەلدىك تۋريستەرگە پارلامەنتكە تۇراقتى تانىسۋ ساپارلارىن ۇيىمداستىرۋ ماسەلەسىن پىسىقتاۋدى تاپسىردى، دەپ حابارلايدى infohub.kz سايتى.
جوگوركۋ كەنەشتىڭ ءباسپاسوز قىزمەتىنىڭ مالىمەتىنشە، سوڭعى جىلدارى شەتەل ازاماتتارىنىڭ قىرعىز پارلامەنتىنىڭ قىزمەتىنە قىزىعۋشىلىعى ارتىپ، جوگوركۋ كەنەشتىڭ جۇمىسىمەن تانىسۋعا دەگەن وتىنىشتەر كوبەيىپ كەلەدى.
«ەكسكۋرسيالىق باعدارلاما اياسىندا تۋريستەرگە مۇراجاي مەن ءماجىلىس زالدارىن ارالاۋ مۇمكىندىگى بەرىلەدى. مۇنداي ساپارلار بەلگىلەنگەن تارتىپپەن اپتاسىنا ءبىر رەت وتكىزىلەدى دەپ جوسپارلانىپ وتىر. ەكسكۋرسيالىق ساپارلاردى ۇيىمداستىرۋ جوگوركۋ كەنەشتىڭ اشىقتىعىن ارتتىرۋعا ىقپال ەتىپ، شەتەلدىك قوناقتارعا قىرعىز رەسپۋبليكاسىنىڭ نەگىزگى مەملەكەتتىك بيلىك ورگاندارىنىڭ ءبىرى رەتىندە پارلامەنت قىزمەتى تۋرالى تولىق تۇسىنىك الۋعا مۇمكىندىك بەرەدى»، — دەلىنگەن ءباسپاسوز قىزمەتىنىڭ مالىمدەمەسىندە.
سونداي-اق جوگوركۋ كەنەشتە كەلۋشىلەر پارلامەنتتىڭ كادەسىي ونىمدەرىن ساتىپ الا الاتىن ارنايى كادەسىي بۇرىشى اشىلعانى حابارلاندى.
ماماتالييەۆ جوگوركۋ كەنەش عيماراتىنىڭ ەرەكشە مارتەبەسى مەن ستراتەگيالىق ماڭىزى بار ەكەنىن اتاپ ءوتىپ، ساپارلاردى ۇيىمداستىرۋ كەزىندە بەلگىلەنگەن قاۋىپسىزدىك ەرەجەلەرى مەن پارلامەنت اۋماعىندا بولۋ ءتارتىبىن قاتاڭ ساقتاۋ قاجەتتىگىن ايتتى.
«ايتا كەتۋ كەرەك، قىرعىز رەسپۋبليكاسىنىڭ ازاماتتارى ءۇشىن جوگوركۋ كەنەشتىڭ ەسىگى بەلگىلەنگەن تالاپتار مەن كەلۋ ءتارتىبى ساقتالعان جاعدايدا بارلىق بەس جۇمىس كۇنى اشىق»، — دەپ ەسكە سالدى ءباسپاسوز قىزمەتى.