2026 جىلدىڭ جەتى ايىندا قازاقستاندا جول-كولىك وقيعالارى مەن زارداپ شەككەندەر سانىنىڭ ازايعانى تىركەلدى. جول اپاتتارىنىڭ سانى 4%-عا، قازا تاپقاندار — 16%-عا، ال زارداپ شەككەندەر — 6%-عا قىسقاردى، دەپ حابارلايدى infohub.kz سايتى.
ىشكى ىستەر مينيسترلىگىندە اتاپ وتكەندەي، اپاتتاردىڭ ازايۋىنا پروفيلاكتيكالىق شارالار مەن جولدارداعى سيفرلىق باقىلاۋ ىقپال ەتىپ وتىر.
اتالعان كەزەڭدە پوليسەيلەر جول قوزعالىسى ەرەجەلەرىنىڭ 8،7 ميلليوننان استام بۇزىلۋىن جولىن كەستى. ورەسكەل بۇزۋشىلىقتار ءۇشىن 18 مىڭ جۇرگىزۋشى كولىك قۇرالىن باسقارۋ قۇقىعىنان ايىرىلدى، تاعى 15،5 مىڭ ادام اكىمشىلىك قاماۋعا الىندى.
ەل جولدارىندا 31 مىڭنان استام اۆتوماتتى بۇزۋشىلىق تىركەۋ جۇيەسى جۇمىس ىستەيدى. ولاردىڭ كومەگىمەن 5،7 ميلليون بۇزۋشىلىق انىقتالدى. كامەرالار تەحنيكالىق بايقاۋدان ءوتۋدى جانە ساقتاندىرۋ ءپوليسىنىڭ بولۋىن باقىلاۋعا دا مۇمكىندىك بەرەدى.
پروفيلاكتيكالىق شارالار باسقا سالالاردا دا ناتيجە بەرۋدە. ءىىم اكىمشىلىك پوليسيا كوميتەتى ءتوراعاسىنىڭ ورىنباسارى باعلانبەك ايتپاەۆتىڭ ايتۋىنشا، 2025 جىلى قازاقستاندا 96،6 مىڭ قىلمىس تىركەلگەن — بۇل ءبىر جىل بۇرىنعىدان 6%-عا از.
«2026 جىلدىڭ ءبىرىنشى جارتىجىلدىعىندا قىلمىس دەڭگەيى تاعى 10%-عا تومەندەدى. سونىمەن قاتار قوعامدىق ورىندارداعى قۇقىق بۇزۋشىلىقتار سانى 19%-عا ازايدى»، — دەدى ول.
بيلىك بۇل ناتيجەلەردى قىلمىسقا جاۋاپ بەرۋدەن ونىڭ الدىن الۋعا كوشۋمەن جانە سيفرلىق تەحنولوگيالاردى كەڭىنەن قولدانۋمەن بايلانىستىرادى.
الدىڭعى كۇنى قازاقستاننىڭ كولىك مينيسترلىگى ەلدەگى جول اپاتتارىنىڭ باستى سەبەبىن اتادى. ۆەدومستۆونىڭ دەرەگىنشە، بارلىق اپاتتاردىڭ 91%-ى جول قوزعالىسى ەرەجەلەرىن ورەسكەل بۇزۋ سالدارىنان بولادى.