قازاقستاننىڭ ەكولوگيا جانە تابيعي رەسۋرستار مينيسترلىگى الەۋمەتتىك جەلىلەردە تاراعان جولبارىس فوتوسىنىڭ شىندىققا جاناسپايتىنىن مالىمدەدى. ۆەدومستۆونىڭ Telegram-ارناسىندا جاريالانعان رەسمي مالىمدەمەگە سايكەس، الماتى وبلىسىنداعى «ىلە-بالقاش» مەملەكەتتىك تابيعي رەزەرۆاتىنىڭ اۋماعىنا جىبەرىلگەن جولبارىس بەينەلەنگەن سۋرەت شىندىققا سايكەس كەلمەيدى، دەپ حابارلايدى infohub.kz.
مينيسترلىكتە جاريالانعان سۋرەتتە جاساندى ينتەللەكت تەحنولوگيالارىن قولدانۋ ارقىلى جاسالۋى مۇمكىن بەلگىلەر بار ەكەنىن اتاپ ءوتتى. جىبەرىلگەن جولبارىس سپۋتنيكتىك GPS-وشەينيكپەن جابدىقتالعان، ال «ىلە-بالقاش» رەزەرۆاتىنىڭ ماماندارى ونىڭ ورنالاسقان جەرى مەن جاعدايىن تاۋلىك بويى باقىلاپ وتىر. سوندىقتان جانۋاردىڭ كەزدەيسوق تىركەلگەنى تۋرالى اقپارات شىندىققا سايكەس كەلمەيدى.
ۆەدومستۆو ازاماتتار مەن ب ا ق وكىلدەرىن اقپاراتتى تاراتپاس بۇرىن ونىڭ دۇرىستىعىن تەكسەرۋگە جانە تەك رەسمي كوزدەردى پايدالانۋعا شاقىردى. سونداي-اق، ادەيى جالعان اقپارات تاراتۋ جانە دايەكسىز فوتو-بەينە ماتەريالداردى جاريالاۋ قازاقستان رەسپۋبليكاسىنىڭ زاڭناماسىندا كوزدەلگەن جاۋاپكەرشىلىككە اكەپ سوعۋى مۇمكىن ەكەندىگى ەسكەرتىلەدى.
ەسكە سالايىق، جاقىندا «ىلە-بالقاش» مەملەكەتتىك تابيعي رەزەرۆاتىنىڭ اۋماعىندا 70 جىل ىشىندە العاش رەت امۋر جولبارىسىنىڭ ۇرعاشىسى جابايى تابيعاتقا جىبەرىلگەن ەدى.