قازاقستاندا پروفيلاكتيكالىق مەديسينالىق تەكسەرۋلەر مەن سكرينينگتىك زەرتتەۋلەردىڭ تيىمدىلىگىن ارتتىرۋ جوسپارلانۋدا. دەنساۋلىق ساقتاۋ مينيسترلىگى قولدانىستاعى ەرەجەلەرگە وزگەرىستەر ەنگىزدى. جاڭا ەرەجەلەر بويىنشا جۇمىسكەرلەر عانا ەمەس، جۇمىس بەرۋشىلەر دە مىندەتتى سكرينينگتەن ءوتۋ قاجەتتىگى تۋرالى اۆتوماتتى تۇردە حابارلاندىرىلاتىن بولادى. ۆەدومستۆونىڭ پىكىرىنشە، جاڭا جۇيە پروفيلاكتيكالىق تەكسەرۋلەردەن ۋاقتىلى ءوتۋ ءۇشىن جاۋاپكەرشىلىكتى ارتتىرىپ، جۇمىس ىستەيتىن حالىقتىڭ دەنساۋلىعىن نىعايتۋعا كومەكتەسەدى. بۇل تۋرالى infohub.kz سايتى حابارلايدى.
قازاقستان رەسپۋبليكاسى دەنساۋلىق ساقتاۋ مينيسترلىگى مىندەتتى مەديسينالىق تەكسەرۋلەر مەن سكرينينگتىك زەرتتەۋلەردى جۇرگىزۋ قاعيدالارىنا وزگەرىستەر مەن تولىقتىرۋلار ەنگىزۋ تۋرالى بۇيرىق جوباسىن ازىرلەدى. قۇجات ازاماتتار مەن جۇمىس بەرۋشىلەرگە پروفيلاكتيكالىق تەكسەرۋلەردەن ءوتۋ قاجەتتىگى تۋرالى حابارلاۋ ءتارتىبىن جەتىلدىرۋدى كوزدەيدى.
تۇزەتۋلەردى دەنساۋلىق ساقتاۋ ءمينيسترىنىڭ مىندەتىن اتقارۋشىنىڭ 2020 جىلعى 15 قازانداعى № ق ر دسم-131/2020 بۇيرىعىنا (مىندەتتى مەديسينالىق تەكسەرۋلەر قاعيدالارى بەكىتىلگەن) جانە 2020 جىلعى 30 قازانداعى № ق ر دسم-174/2020 بۇيرىعىنا (سكرينينگتىك زەرتتەۋلەردى رەتتەيتىن) ەنگىزۋ ۇسىنىلىپ وتىر.
نەگىزگى جاڭاشىلدىقتاردىڭ ءبىرى – جۇمىسكەرلەر مەن جۇمىس بەرۋشىلەرگە سكرينينگتىك زەرتتەۋلەردەن ۋاقتىلى ءوتۋ قاجەتتىگى تۋرالى حابارلاۋ مەحانيزمىن ەنگىزۋ. مينيسترلىكتىڭ پىكىرىنشە، مۇنداي شارا ەڭبەك قاتىناستارىنا قاتىسۋشىلاردىڭ حاباردارلىعىن ارتتىرىپ، پروفيلاكتيكالىق تەكسەرۋلەرگە جاۋاپكەرشىلىكپەن قاراۋعا ىقپال ەتەدى.
قۇجات جوباسىنا تۇسىندىرمەدە اتاپ وتىلگەندەي، حابارلاندىرۋلار جۇمىسكەرلەردىڭ مىندەتتى مەديسينالىق تەكسەرۋلەر مەن سكرينينگتىك زەرتتەۋلەردەن ۋاقتىلى وتۋگە قىزىعۋشىلىعىن ارتتىرۋ ءۇشىن قولدانىلادى. سونىمەن قاتار جۇمىس بەرۋشىلەر ءوز قىزمەتكەرلەرىنە وسىنداي تەكسەرۋلەردەن ءوتۋدى ۇيىمداستىرۋ قاجەتتىگى تۋرالى ۋاقتىلى اقپارات الا الادى.
جوبا ازىرلەۋشىلەرىنىڭ پىكىرىنشە، جاڭا حابارلاندىرۋ جۇيەسىن ەنگىزۋ پروفيلاكتيكالىق جۇمىستىڭ تيىمدىلىگىن ارتتىرىپ، حالىقتى مىندەتتى مەديسينالىق تەكسەرۋلەرمەن جانە سكرينينگتەرمەن كەڭىنەن قامتۋدى قامتاماسىز ەتەدى. سونىمەن قاتار بۇل ۋاقتىلى دياگنوستيكانىڭ ارقاسىندا اۋرۋلاردى ەرتە انىقتاۋعا جانە اۋىر اسقىنۋلاردىڭ دامۋ ءقاۋپىن تومەندەتۋگە ىقپال ەتەدى. بۇدان باسقا، ۇسىنىلىپ وتىرعان وزگەرىستەر دەنساۋلىق ساقتاۋ سالاسىنداعى پروسەستەردى ودان ءارى سيفرلاندىرۋعا جانە مەديسينالىق ۇيىمدار، جۇمىسكەرلەر مەن جۇمىس بەرۋشىلەر اراسىنداعى ءوزارا ءىس-قيمىلدى جەتىلدىرۋگە باعىتتالعان. بۇيرىق بەكىتىلگەننەن كەيىن حابارلاندىرۋ مەحانيزمى قولدانىستاعى پروفيلاكتيكالىق مەديسينالىق باقىلاۋ جۇيەسىنىڭ ءبىر بولىگىنە اينالىپ، مىندەتتى تەكسەرۋلەردەن ءوتۋدى ۇيىمداسقان ءارى ۋاقتىلى ەتۋگە كومەكتەسەدى دەپ كۇتىلۋدە.