سوڭعى مالىمەتتەر بويىنشا، قازاقستاندا 444،6 مىڭ جۇمىسسىز ازامات تىركەلگەن. بۇل رەتتە ءۇي شارۋاسىنداعى ايەلدەر مەن ستۋدەنتتەردى قوسقاندا 4،8 ملن ادام ەسەپكە كىرمەگەن. تولىق اقپاراتتى infohub.kz سايتى حابارلايدى.
ۇلتتىق ستاتيستيكا بيۋروسىنىڭ دەرەگىنشە، 2026 جىلدىڭ ەكىنشى توقسانىندا رەسپۋبليكادا 444،6 مىڭ جۇمىسسىز بولعان. جۇمىسسىزدىقتىڭ جالپى دەڭگەيى 4،5 پايىزدى قۇرادى – بۇل الدىڭعى توقسانمەن بىردەي.
ەسكە سالايىق، قازاقستاندا جۇمىسسىزدىق حالىقارالىق ەڭبەك ۇيىمىنىڭ (حەۇ) ادىستەمەسى بويىنشا انىقتالادى. ول 15 جاستان اسقان، تابىس اكەلەتىن جۇمىسى جوق، بەلسەندى تۇردە جۇمىس ىزدەپ، جاقىن ارادا جۇمىسقا كىرىسۋگە دايىن ادامداردىڭ جۇمىس كۇشى قۇرامىنداعى ۇلەسى رەتىندە ەسەپتەلەدى.
ەل بويىنشا جۇمىس كۇشىنە كىرەتىندەردىڭ سانى 9،8 ملن ادامنان اسادى. ونىڭ ىشىندە 7،3 ملن-عا جۋىعى جالدامالى جۇمىسشىلار، ال 2،1 ملن-نان استامى جەكە كاسىپكەرلەر، ءوزىن-وزى جۇمىسپەن قامتىعاندار جانە ەڭبەك شارتىنسىز جۇمىس ىستەيتىندەر.
سونىمەن قاتار، 15 جاستان اسقان 4،8 ملن ادام جۇمىسسىزدىق ستاتيستيكاسىنا ەنبەگەن. بۇل توپقا زەينەتكەرلەر، ستۋدەنتتەر، ءۇي شارۋاسىنداعى ايەلدەر جانە باسقا دا ساناتتاعى تۇرعىندار كىرەدى.
قازاقستانداعى ەڭ جوعارى جۇمىسسىزدىق دەڭگەيى ماڭعىستاۋ وبلىسىندا تىركەلگەن – 5 پايىز. ودان كەيىن اتىراۋ، جامبىل جانە پاۆلودار وبلىستارى – ءارقايسىسىندا 4،8 پايىز.
استانادا جۇمىسسىزدىق دەڭگەيى 2026 جىلدىڭ ەكىنشى توقسانىندا 4،2 پايىزدى، الماتىدا – 4،4 پايىزدى، ال شىمكەنتتە – 4،6 پايىزدى قۇرادى. ەڭ تومەنگى كورسەتكىش قاراعاندى وبلىسى مەن ۇلىتاۋ وبلىسىندا – 4 پايىزدان.
ەسكە سالايىق، قازاقستاندا جۇمىسىنان ايىرىلعان ازاماتتار الەۋمەتتىك تولەمدەر الا الادى. وتەماقى التى اي بويى تولەنۋى مۇمكىن، ال ونى قالاي راسىمدەۋ كەرەكتىگى تۋرالى وسى جەردەن وقۋعا بولادى.
بۇعان دەيىن اۋىل شارۋاشىلىعى مينيسترلىگى ەرەكشە ماڭىزدى، شۇعىل جانە كۇردەلى جۇمىستاردى اتقاراتىن قازاقستاندىقتارعا ۇستەمەاقى مولشەرىن ۇلعايتۋدى جوسپارلاپ وتىرعانى حابارلانعان بولاتىن.