قازاقستاندا 2026 جىلدىڭ ءبىرىنشى جارتىجىلدىعىندا جول-كولىك وقيعالارىنان قازا تاپقاندار مەن زارداپ شەككەندەردىڭ سانى ازايعانىمەن، جول اپاتتارىنىڭ جارتىسىنان كوبىن جول ءجۇرۋ ەرەجەلەرىن ورەسكەل بۇزۋشىلار جاساعان، دەپ حابارلايدى infohub.kz سايتى.
باس پروكۋراتۋرانىڭ مالىمەتىنشە، 2026 جىلدىڭ العاشقى التى ايىندا ەلدە 15 188 جول-كولىك وقيعاسى تىركەلگەن. ونىڭ جارتىسىنان استامىن جول ءجۇرۋ ەرەجەلەرىن ورەسكەل بۇزۋشىلار جاساعان.
ۆەدومستۆو وڭ ديناميكانى اتاپ ءوتتى: جول-كولىك وقيعالارىندا جاراقات العانداردىڭ سانى 6%-عا (22 346-دان 21 007-گە دەيىن)، ال قازا تاپقاندار 15،5%-عا (955-تەن 807-گە دەيىن) ازايعان. وسىنىڭ ارقاسىندا 148 ادامنىڭ ءومىرىن ساقتاپ قالۋ مۇمكىن بولدى.
پروكۋراتۋرادا ناقتىلاعانداي، ەڭ اۋىر زارداپتار جىلدامدىقتى اسىرۋ جانە ءقاۋىپتى مانەۆر جاساۋمەن بايلانىستى. ءدال وسى بۇزۋشىلىقتار 8 مىڭنان استام ادامنىڭ جاراقات الۋىنا جانە 676 ازاماتتىڭ قازا تابۋىنا سەبەپ بولعان.
جىل باسىنان بەرى جاياۋ جۇرگىنشىلەر وتكەلدەرىندە 5 971 ادام جاراقات العان، 208 ادام قازا تاپقان، ونىڭ ىشىندە 40 بالا. سونداي-اق، ماس جۇرگىزۋشىلەردىڭ كىناسىنەن 209 ادام زارداپ شەككەن، تاعى سەگىز ادام قايتىس بولعان.
قاداعالاۋ ورگانى جىل باسىنان بەرى اكىمشىلىك قۇقىق بۇزۋشىلىق تۋرالى كودەكستىڭ 434-بابى بويىنشا 29 كولىك حۋليگانى قاماۋعا الىنعانىن حابارلادى.