زيمبابۆەدەگى كاريبا كولىندە بولعان پاروم اپاتىنان قازا تاپقاندار سانى 84-كە جەتتى. بۇل تۋرالى جەكسەنبى كۇنى پوليسيا حابارلادى. تاعى بىرنەشە ءمايىت تابىلعان. سەيسەنبى كۇنى قاتتى تولقىننان پاروم اۋدارىلىپ، 77 ادام قۇتقارىلعان ەدى. بۇل تۋرالى زيمبابۆەنىڭ توتەنشە جاعدايلار جونىندەگى اگەنتتىگى مالىمدەدى.
پوليسيانىڭ ايتۋىنشا، قازا تاپقاندار سانى ءبىر كۇن بۇرىنعى 72-دەن 84-كە وسكەن. پاروم 90 جولاۋشىعا ارنالعان، الايدا بولجام بويىنشا وندا 153 ادام بولۋى مۇمكىن ەدى. سوڭعى رەسمي دەرەكتەر بۇل كورسەتكىشتىڭ ودان دا جوعارى بولۋى ىقتيمال ەكەنىن كورسەتەدى. پوليسيا ىزدەستىرۋ جۇمىستارى ءالى جالعاسىپ جاتقانىن، حابارسىز كەتكەندەردىڭ مايىتتەرىن تابۋعا تىرىسىپ جاتقانىن ايتتى.
ەسكى پاروم ەلدىڭ سولتۇستىك-باتىسىنداعى اۋىلدىق جانە بالىقشىلىق قاۋىمداستىقتارعا قاراي كاريبا قالاسىنان ءجۇزىپ شىققان. بۇل ايماقتا جولدار ب ۇلىنگەن، قوعامدىق كولىك سيرەك كەزدەسەدى.
قازا تاپقانداردىڭ ىشىندە 18 بالا بار، ولاردىڭ ەڭ كىشىسى نەبارى 1 جاستا. پوليسيا مالىمەتىنشە، قۇربانداردىڭ 16-سى 10 جاسقا دەيىنگى بالالار.
كاريبا — الەمدەگى كولەمى بويىنشا ەڭ ۇلكەن جاساندى كول. ول 1950-جىلداردىڭ اياعى مەن 1960-جىلداردىڭ باسىندا زامبەزي وزەنىن بوگەۋ ارقىلى پايدا بولعان. كولدىڭ ۇزىندىعى 200 شاقىرىمنان اسادى، ال ەنى كەي جەرلەردە 40 شاقىرىمعا جەتەدى. كاريبا كولىن زيمبابۆە مەن زامبيا بولىسەدى، ولاردىڭ شەكاراسى كولدىڭ ورتاسىمەن وتەدى.