پالەونتولوگتار زيمبابۆەدەن تابىلعان قالدىقتار بويىنشا Musango matusadonaensis دەگەن جاڭا دينوزاۆر ءتۇرىن سيپاتتادى. بۇل تابىلعان جادىگەر افريكانىڭ كەش ترياس داۋىرىندەگى ەكوجۇيەلەرى تۋرالى تۇسىنىكتى وزگەرتەدى، دەپ حابارلايدى infohub.kz سايتى.
حالىقارالىق پالەونتولوگتار توبى 2018 جىلى زيمبابۆەنىڭ سولتۇستىگىنەن قازىپ الىنعان قاڭقانى زەرتتەدى. جانۋاردىڭ جاسى شامامەن 210 ميلليون جىل – بۇل كەش ترياس كەزەڭى. دينوزاۆردىڭ اتاۋى شونا تىلىندەگى «مۋسانگو» سوزىنەن شىققان، ول «بۇتادا تىرشىلىك ەتەتىن» دەگەندى بىلدىرەدى.
Musango matusadonaensis جەڭىل دەنە بىتىمىنە يە بولدى: ۇزىندىعى شامامەن 4،5 مەتر، سالماعى – 222 كەلىدەي. قازبا قالدىقتارىندا ومىرتقالار، قابىرعالار جانە اياق-قول سۇيەكتەرى جاقسى ساقتالعان. عالىمدار جانۋاردىڭ شامامەن سەگىز جاستا بولعانىن انىقتادى. سۇيەكتەردە باستان كەشكەن جاراقات نەمەسە ينفەكسيانىڭ ىزدەرى تابىلدى. باس سۇيەگى ساقتالماعان، ءبىراق دينوزاۆر وسىمدىكقورەكتى نەمەسە بارىقورەكتى بولعان دەپ بولجانادى.
جۇمىس اۆتورلارىنىڭ ءبىرى، لوندونداعى جاراتىلىستانۋ مۇراجايىنىڭ قىزمەتكەرى پول باررەتت: «جاقىندا عانا وڭتۇستىك افريكا دينوزاۆر فاۋناسى بىردەي بولدى دەپ ەسەپتەلىپ كەلدى» دەپ اتاپ ءوتتى. تابىلعان جادىگەر ايماقتىڭ ءارتۇرلى ەكوجۇيەلەردەن تۇرعانىن كورسەتەدى. زەرتتەۋ ناتيجەلەرى Journal of Systematic Palaeontology جۋرنالىندا جاريالاندى.